23 C
Yerevan
14 Օգոստոսի, 2020
91958.4 By Google Analytics 13.08.2020
Գլխավոր » ՀՀ նախագահը ստորագրել է վարչական դատավարությանը և վարչական վարույթին առնչվող օրենքները
Այլ Լուրեր

ՀՀ նախագահը ստորագրել է վարչական դատավարությանը և վարչական վարույթին առնչվող օրենքները

հետևեք մեզ նաև Telegram-ում

 ՀՀ նախագահի աշխատակազմը հայտարարություն է տարածել «Վարչական դատավարության օրենսգրքում լրացում և փոփոխություններ կատարելու» և «Վարչարարության հիմունքների և վարչական վարույթի մասին» օրենքում լրացում կատարելու մասին» օրենքների մասին՝ տեղեկացնելով, որ ՀՀ նախագահն ստորագրել է այդ օրենքները։ Այս մասին տեղեկացրին Հայաստանի Հանրապետության նախագահի աշխատակազմի հասարակայնության հետ կապերի վարչությունից։

««Վարչական դատավարության օրենսգրքում լրացում և փոփոխություններ կատարելու» և «Վարչարարության հիմունքների և վարչական վարույթի մասին» օրենքում լրացում կատարելու մասին» օրենքները (այսուհետ՝ Օրենքներ) Հանրապետության նախագահի ստորագրմանն են ներկայացվել 2020թ. հուլիսի 13-ին:

Հանրապետության նախագահի աշխատակազմը հանգամանալից ուսումնասիրել է Օրենքները և դրանց հնարավոր ազդեցությունը հանրային կյանքի և գործարար միջավայրի վրա, ինչպես նաև Օրենքների վերաբերյալ հնչած` մասնագիտական հանրության և հասարակության ներկայացուցիչների տեսակետները, զանգվածային լրատվամիջոցների հրապարակումները և համապատասխան վերլուծություն ներկայացրել Հանրապետության նախագահին:

Հանրապետության նախագահին տրամադրվել է նաև տեղեկատվություն հանքարդյունաբերության ոլորտի մասնագետների, Օրենքների մշակման առաջարկությամբ հանդես եկած՝ «Կառուցապատողների հայկական ասոցիացիայի» դիրքորոշման, Օրենքների ընդունման վերաբերյալ Կառավարության և Ազգային ժողովի հիմնավորումների մասին: Հանրապետության նախագահը կարևորում է կառուցապատման ոլորտում առկա խնդիրների կարգավորումը:

Կատարված վերլուծությունից կարելի է եզրակացնել, որ Օրենքներով սահմանվում են ոչ համալիր կարգավորումներ, առկա են որոշակի ռիսկեր, մասնավորապես՝ հանքարդյունաբերության ոլորտում բնական պաշարների ողջամիտ շահագործման և բնակչության իրավունքների ու օրինական շահերի պաշտպանության տեսանկյունից:

Հանրապետության նախագահը կարևորում է նաև Օրենքների բարեխիղճ և բարձր պատասխանատվությամբ կիրառումը:

Հակառակ դեպքում կարող են դրսևորվել անձանց սեփականության իրավունքի և սոցիալական արդարության սկզբունքի խախտումներ, անդառնալի վնաս հասցվել մշակութային և ճարտարապետական ժառանգությանը, շրջակա միջավայրին և հանրային առողջությանը:

Օրենքների կիրառման ընթացքում պետք է հետևողականորեն ապահովվի անձանց և կազմակերպությունների արդյունավետ դատական պաշտպանության իրավունքը: Պետք է սահմանվեն խախտված իրավունքների համար համարժեք և արդարացի փոխհատուցման արդյունավետ կառուցակարգեր:

Հանրապետության նախագահը, ըստ Սահմանադրության, չունի Օրենքներն իր առարկություններով և առաջարկություններով, հետագա քննարկման համար Ազգային ժողով վերադարձնելու լիազորություն: Նման հնարավորության դեպքում, հանգամանալից և բազմակողմանի քննարկումների միջոցով հնարավոր կլիներ ընդունել առավել հավասարակշռված և հասարակության բոլոր խմբերի շահերը հաշվի առնող Օրենքներ, առաջարկել լուծումներ, որոնք կկարգավորեին ոլորտում առկա խնդիրները՝ միաժամանակ, ապահովելով այլ անձանց իրավունքների իրացման և պաշտպանության առավել արդյունավետ կառուցակարգեր և ընթացակարգեր:

Հանրապետության նախագահի աշխատակազմի ուսումնասիրությունների և իրավաբանների կարծիքների վերլուծությունից կարելի է եզրահանգել, որ Օրենքներն առերևույթ սահմանադրականության խնդիր չունեն:

Հանրապետության նախագահը ստորագրել է Օրենքները:

Ստորագրելով Օրենքները՝ Հանրապետության նախագահը Սահմանադրությամբ իրեն վերապահված լիազորությունների շրջանակում հետևելու է դրանց կիրառմանը»,- նշված է հայտարարության մեջ:

Նմանատիպ Հոդվածներ

ՀՀ նախագահն անդրադարձել է Բեյրութում ստեղծված իրավիճակին և լիբանանահայության հետ կապված խնդիրներին

Անի Գրիգորյան

Խոնարհումս կյանքը հայրենիքին ու ժողովրդին նվիրաբերած բոլոր հերոսների հիշատակին. ՀՀ նախագահ

Սերինե

ՀՀ նախագահը հանդիպել է սահմանադրական բարեփոխումների մասնագիտական հանձնաժողովի անդամների խմբի հետ

Սերինե
Բեռնում.....

Մեր կայքը օգտագործում է cookie-ներ Ձեր հարմարավետության համար։ Հաստատել Կարդալ ավելին