NewArmenia.am-ը քիչ առաջ ահազանգ ստացավ Գեղարքունիքի մարզի Սոթք համայնքի ոսկու հանքի աշխատակիցներից, որ արդեն մեկ ժամ է, ինչ ադրբեջանցի զինվորները գտնվում են Սոթքի ոսկու հանքում և պահանջում են ազատել իրենց տարածքները, իրավիճակը լարված է: Թե ինչ է լինելու հետո, ինչ են անելու՝ չգիտեն։
ՊՆ հասարակայնության հետ կապերի և տեղեկատվական վարչության պետ Գևորգ Ալթունյանը NewArmenia.am-ի հարցին ի պատասխան ասաց, թե այդ տեղեկությունը չի համապատասխանում իրականությանը: Մեր տարակուսանքին, թե այսինքն աշխատակիցները սո՞ւտ են ասում, Ալթունյանն ասաց. «Ճշտել ենք, այդ լուրերը չեն համապատասխանում իրականությանը: Այդ մարդիկ սուտ են խոսում, թե վառ երևակայություն ունեն, չեմ կարող պատասխանել»:
Հ.Գ. Պաշտոնական հերքումից հետո կրկին կապվեցինք աշխատակցի հետ, որը պնդեց, որ ադրբեջանցիները հենց հիմա հանքի տարածքում են:
Մարինե Խառատյան