Թուրքիայի ագրեսիվ քաղաքականությունը Արցախ հանդեպ չի նահանջում: Նախօրեին Թուրքիայի նախագահ Ռեջեփ Էրդողանը Թուրքիայի խորհրդարանում հայտարարել է, թե Ռուսաստանը, Թուրքիան և Ադրբեջանը կդառնան Հարավային Կովկասում անվտանգության երաշխավորը:
«Ես երեկ քննարկել եմ հարցը Ռուսաստանի նախագահ Պուտինի հետ, մենք համատեղ դա կարող ենք երաշխավորել, բայց նաև հնարավորություն ունենք բարելավել այդ գործընթացը», — ասել է Թուրքիայի նախագահը՝ մանրամասնելով,- «Եթե ներգրավենք նաև տարածաշրջանային չորրորդ կամ հինգերորդ երկիրը, կարող ենք բոլորովին այլ իրավիճակ ստեղծել»։
Արցախի հարցով Ռուսաստանի հետ սեպարատ հեռախոսազրույց-բանակցությունից հետո թուրքական կողմը շեշտել էր քննարկված հրադադարի վերահսկման համատեղ կենտրոնի մասին՝ ընդգծելով, որ թուրքական կողմում ակնկալում են օր առաջ խոսքից անցնել գործի: Սա այն դեպքում, երբ Հայաստան-Ադրբեջան-Ռուսաստան համաձայնագրով նման բան նախատեսված չէ:
Ընդ որում՝ Ադրբեջանի հետ կապված Էրդողանը խոսել է տիրոջ կարգավիճակով. «Մենք մեծ ներդրում ունեցանք անարդարության վերացման գործում, որ տիրում էր Ադրբեջանում 30 տարի», — պնդել է Էրդողանը, ընդգծելով՝ Անկարան շարունակելու է ջանքերն այս ուղղությամբ։
Ուշագրավ է, որ Թուրքիայի ղեկավարության ագրեսիվ հայտարարություններին ու քաղաքականությանը լուռ հետևում են Հայաստանում ու Արցախում:
NewArmenia.am-ը հարց ուղղեց ՀՀ ԱԳՆ-ին, թե ինչո՞ւ Հայաստանը չի հակադարձում, երբ Թուրքիայի նախագահը, խոսելով Արցախի մասին, հայտարարում է այսուհետ Հարավային Կովկասում խաղաղության երաշխավորը լինելու մասին, հատկապես, որ ստորագրված հայտարարությամբ նման բան նախատեսված չէ:
«ՀՀ ԱԳՆ-ն չի մեկնաբանում իր կողմից մեկնաբանություններ, հայտարարություններ անելու ժամանակագրությունը»,- ի պատասխան փոխանցել են ԱԳՆ լրատվության և հանրային դիվանագիտության բաժնից՝ հավելելով. «Թուրքիայի ներգրավվածության մասով ՀՀ ԱԳՆ-ն բազմիցս հանդես է եկել հայտարարությամբ, մեկնաբանություններով, որոնք հասանելի են նաև ՀՀ ԱԳՆ պաշտոնական կայքէջում»:
Նշանակում է՝ «հաղթանակած» ՀՀ դիվանագիտությունը ասելիք չունի Թուրքիայի ագրեսիայի դեմ այսօր ու հարմարվում է ռուս-թուրքական վտանգավոր խաղին:
Մարինե Խառատյան
