Մարդու իրավունքների Եվրոպական դատարանը բավարարել է ևս 13 հայ գերիների մասով բողոքները և պահանջել կիրառել հրատապ միջոց: Այս մասին NewArmenia.am-ի հարցին ի պատասխան ասաց հայ գերիների հարցերով զբաղվող իրավապաշտպան, արդարադատության նախկին նախարար Արտակ Զեյնալյանը:
Այդ խմբի գերիներից 10-ը զինվորականներ են, 3-ը՝ քաղաքացիական անձինքը: Ընդ որում նրանց մեջ են 80-անց ամուսիններ, որոնք գերեվարվել են Հադրութի գյուղերից: Գերեվարված տարեց կնոջ անունը Արեգա է:
Հիշեցնենք, որ հայ գերիների ընտանիքի անդամների անունից դիմումներ են ներկայացվել Եվրոպական դատարան՝ կյանքի և անմարդկային վերաբերմունքից զերծ լինելու իրավունքները պաշտպանելու մասին հրատապ միջոց կիրառելու պահանջով:
Եվրոպական դատարանը Ադրբեջանի կառավարությունից պահանջել է փաստաթղթավորված տեղեկություն նրանց գերեվարման փաստի, գտնվելու վայրի, պահման պայմանների և բժշկական սպասարկման վերաբերյալ:
Վերջին շրջանում, ըստ Զեյնալյանի, ՄԻԵԴ-ը հրատապ միջոց կիրառելու որոշում է կայացրել մոտ 40 հայ գերու վերաբերյալ:
Մարինե Խառատյան
