«Թուրքական ռազմական ներկայությունը Ադրբեջանի տարածքում է լինելու, Արցախի տարածքում չէ»,-անդրադառնալով Թուրքիայի ԱԳ նախարար Մևլութ Չավուշօղլուի հայտարարության առթիվ մեր հարցին, ասաց ՊՆ լրատվական ծառայության ղեկավար Գևորգ Ալթունյանը:
Նշենք, որ Չավուշօղլուն ասել է, թե Լեռնային Ղարաբաղի վերաբերյալ Ռուսաստանի և Թուրքիայի միջև ստորագրվել է 3 արձանագրություն:
«Թուրքական դիտորդական կետերի մասին խոսակցությունը վաղուց է գնացել: Մեզ համար գերխնդիրը եղել է, որ Ղարաբաղի տարածքում նման դիտորդական խմբեր չլինեն և գործողություն չիրականացնեն»,- ասաց Ալթունյանը:
Մեր դիտարկմանը, թե Արցախի հարևանությամբ Թուրքիայի ռազմական ներկայության մասին է խոսք գնում, Ալթունյանը պատասխանեց. «Հրապարակված եռակողմ փաստաթղթից բացի, այլ բան չկա հրապարակված և ստորագրված: Թուրքական կողմը կարող է հազար բան ասել: Մինչև դա հրապարակված փաստաթուղթ չի, մեզնից որևէ մեկը չի կարող դատողություն անել, թե ինչի մասին է խոսքը»:
Նշենք, որ Չավուշօղլուն ասել է, թե Ադրբեջանում թուրքական դիտորդական կետի տեղակայումը եղբայրական երկրի նկատմամբ իրավասությունների շրջանակում է: «Ադրբեջանի կողմից զորախմբի թվաքանակի, տեղի, ժամանակի հաստատումից հետո հարցը կարող է լուծում ստանալ»,- ասել է Չավուշօղլուն:
Մարինե Խառատյան
