Այս աղջիկն իր բնական գեղեցկությամբ նվաճել է Նորաձևության շաբաթը Միլանում: Պատմում ենք այն ամենը, ինչ գիտենք Հայաստանից մոդելի մասին,- գրում է «instyle.ru» կայքը:
Նա 23 տարեկան է
Հիմա Արմինե Հարությունյանը 23 տարեկան է: Սովորաբար մոդելներն իրենց կարիերան սկսում են շատ ավելի վաղ, սակայն շնորհակալություն հայտնենք փոփոխվող մոդելային բիզնեսին. տարիքը դադարել է լինել որոշիչ գործոն մոդելի կարիերայի համար:
Նա նկարիչ է
Արմինեն մեծացել է ստեղծագործական ընտանիքում: Նրա պապը` Խաչատուր Ազիզյանը, Հայաստանի ամենաճանաչված նկարիչներից մեկն է: Նրա ընտանիքի բոլոր անդամները կամ նկարում են, կամ օգնում ցուցահանդեսների կազմակերպման հարցում: Արմինեն նույնպես որոշել է նկարչուհի դառնալ, համալսարանում սովորում է զգեստների ձևավորում:
«Gucci»-ի գործակալը նրան տեսել է փողոցում
Բեռլին այցելության ժամանակ աղջիկը փողոցում պատահաբար հանդիպել է «Gucci» գործակալի հետ: Աղջկա բնական գեղեցկությունը գործակալին այնպես է գրավել, որ նա անմիջապես մոտեցել է աղջկան և առաջարկել մասնակցել ցուցադրությանը: Արմինեն նման առաջարկից, իհարկե, չի հրաժարվել: Հետո հարցազրույցի ժամանակ աղջիկը պատմել է, որ հենց բնականությունն էր կարևորը բրենդի ներկայացուցիչների համար: «Սովորաբար քասթինգի են գնում բարձրակրունկ կոշիկներով, բայց նրանք զգուշացրել էին, որպեսզի մենք գնանք ցածրակրունկ կոշիկներով, քայլենք սովորական քայլվածքով և ընդհանրապես բնական տեսք ունենանք, լինենք ինչպես սովորական կյանքում»,- պատմել է Արմինեն:
Դա նրա առաջին պրոֆեսիոնալ ցուցադրությունն էր
Մինչ այդ տարին Հարությունյանը նկարահանվել է միայն հայկական փոքր բրենդների համար: Նա երբեք գործակալ չի ունեցել և պոդիումով չի քայլել: Հիմա աղջկա համար կանխատեսում են մեծ ապագա նորաձևության բնագավառում: Եվ նրա համար գործակալ էլ անմիջապես գտնվել է:
