Ռուսական խոշորագույն նավթային ընկերություններից մեկի՝ «Լուկօյլի» տնօրենների խորհրդի ղեկավար Ռավիլ Մագանովը մահացել է հիվանդանոցի պատուհանից ընկնելուց հետո, հայտնում են ռուսական լրատվականները:
Նավթային ընկերության 67-ամյա թոփ-մենեջերը բուժվում էր Մոսկվայի Կենտրոնական կլինիկական հիվանդանոցում՝ վեցերորդ հարկում գտնվող բաժանմունքում։
«Ինտերֆաքս»-ի աղբյուրը նույնպես հայտնել է, որ Մագանովը մահացել է։ «Այսօր առավոտյան Մագանովն ընկել է Կենտրոնական կլինիկական հիվանդանոցի պատուհանից։ Նա ստացած վնասվածքներից մահացել է»,- ասել է աղբյուրը։
ՌԻԱ Նովոստիի աղբյուրը հայտնել է, որ «Մագանովը հավանաբար ինքնասպան է եղել»։ Սակայն, այս տեղեկատվության անկախ հաստատում չկա։
Որոշ աղբյորներ, սակայն, մեջբերում են այն վարկածը, որ Մագանովը «ծխելու ժամանակ կարող էր պատահաբար դուրս ընկել հիվանդասենյակից»։
Մոսկվայի իրավապահ մարմինները ՏԱՍՍ-ին հաստատել են, որ Կենտրոնական կլինիկական հիվանդանոցի պատուհանից տղամարդ է ընկել, նա մահացել է։ Մահացածի անունը չի հաղորդվում։
«Լուկօյլը» պաշտոնապես հայտարարել է, որ Ռավիլ Մագանովը մահացել է ծանր հիվանդությունից հետո, գրում է ՌԻԱ Նովոստին։
Մագանովը համարվում է ազգությամբ ադրբեջանցի գործարար Վագիտ Ալեքպերովի ստեղծած «Լուկօյլ» ընկերության անվան հեղինակը։ 1993 թվականից նա «Լուկօյլի» տնօրենների խորհրդի անդամ է, 2020 թվականին գլխավորել է այն։ 2006 թվականից Մագանովը զբաղեցնում է ընկերության առաջին գործադիր փոխնախագահի պաշտոնը։ Ռավիլ Մագանովը մեկ այլ խոշոր նավթային ընկերության՝ «Թաթնեֆտի» գործադիր տնօրեն Նաիլ Մագանովի եղբայրն է։
