Ամերիկյան հեղինակավոր New York Times լրատվականը, օրերս հրապարակած հոդվածում հղում կատարելով ԱՄՆ հետախուզության վերջերս բացահայտված տվյալների վրա, նշում է, որ Ռուսաստանի Դաշնությունը Կորեայի Ժողովրդական Դեմոկրատական Հանրապետությունից (ԿԺԴՀ) գնել է միլիոնավոր հրետանային արկեր և ցածր հեռահարության հրթիռներ:
Ռազմական մատակարարումների ստույգ մասշտաբները հոդվածում չեն նշվում, սակայն Վաշինգտոնում կարծում են, որ Մոսկվայի և Փհենյանի միջև համագործակցությունը կարող է շարունակական լինել։
New York Times-ը գրում է, որ հակառուսական պատժամիջոցները լուրջ հարված են հասցրել ռուսական պաշտպանական արդյունաբերությանը և լրջորեն նվազեցրել են բանակը զինելու Մոսկվայի հնարավորությունները։ Այս համատեքստում պարբերականը հիշեցնում է, որ վերջերս Ռուսաստանի նախագահ Վլադիմիր Պուտինն անձամբ է բանակցել իր մյուս դաշնակցի՝ Իրանի հետ՝ անօդաչու սարքերի մատակարարման շուրջ։ Սպիտակ տան աղբյուրները հայտնում են, որ նրանց առաջին խմբաքանակը Մոսկվա է ժամանել նախորդ շաբաթ:
Իրանը և Հյուսիսային Կորեան իրենք են գտնվում Արևմուտքի լուրջ պատժամիջոցների տակ, և այն փաստը, որ այդ երկրները օգնություն են փնտրում, վկայում է այն մասին, որ Ռուսաստանում իրավիճակն էլ ավելի վատ է, կարծում են Վաշինգտոնում:
Associated Press-ին ԱՄՆ բարձրաստիճան պաշտոնյան ասել էր. «Սա ցույց է տալիս, որ Ուկրաինայում գտնվող ռուսական բանակը տառապում է մատակարարումների լուրջ պակասից, որը մասամբ պայմանավորված է արտահանման և ներմուծման սահմանափակումներով»:
American Enterprise Institute-ի ռազմական փորձագետ Ֆրեդրիկ Քեյգանն էլ կարծում է, որ «Կրեմլը Հյուսիսային Կորեայից կամ որևէ մեկից հրետանային արկեր ու հրթիռներ է գնում միայն այն պատճառով, որ Պուտինը չի ցանկանում կամ ի վիճակի չէ մոբիլիզացնել ռուսական տնտեսությունը՝ պատերազմին նույնիսկ ամենատարրական մակարդակում աջակցություն ցույց տալու համար»:
Նշենք, որ Փհենյանն աջակցել է Ռուսաստանի ներխուժմանը Ուկրաինա: Հյուսիսային Կորեայի բռնապետ Կիմ Չեն Ինը հայտարարել է, որ ամերիկյան հեգեմոնիային վերջ դնելու նպատակն արդարացնում է Ռուսաստանի ռազմական մեթոդները։ Ավելին, նա ճանաչել է Ուկրաինայի արևելյան երկու ռուսամետ սուբյեկտների անկախությունը և խոստացել ամրապնդել բարեկամությունը Մոսկվայի հետ։
Ի պատասխան Պուտինը վստահեցրել է Փհենյանին տարբեր ուղղություններով երկրների միջև հարաբերությունների հետագա զարգացման մասին, հայտնել է հյուսիսկորեական մամուլը։
Ինչ վերաբերում է Իրանին, ապա նշենք, որ վերջինս պաշտոնապես հերքում է պատերազմող կողմերից որևէ մեկին զենքի մատակարարումը, սակայն, ըստ ԱՄՆ հետախուզության տվյալների, ռուս զինվորականները մեկնել են Թեհրան՝ իրանական արտադրության «Մոհաջեր-6» և «Շահեդ» անօդաչու թռչող սարքերի կառավարման դասընթաց անցնելու համար: Սակայն, ԱՄՆ հետախուզության տվյալներով` Ռուսաստանի համար նախատեսված մեծ թվով անօդաչու թռչող սարքեր տեխնիկական խնդիրներ են ունեցել:
Ըստ New York Times-ի՝ ԱՄՆ իշխանությունները սկսել են գաղտնազերծել Ռուսաստանի և Ուկրաինայի շուրջ ստեղծված իրավիճակի մասին որոշ հետախուզական տեղեկատվություն դեռևս ռուսական ներխուժումից առաջ։
Տեղեկությունների մի մասը դաշնակիցներին փոխանցվել է ներքին ուղիներով, մի մասը հրապարակվել է ԶԼՄ-ներում անանուն արտահոսքերի միջոցով:
Ինչպես պարզաբանում է ամերիկյան պարբերականը, դա արվել և արվում է, որպեսզի համաշխարհային հանրությունը ամբողջական պատկերացում ունենա իր կողմից սանձազերծված պատերազմում Ռուսաստանի իրական մտադրությունների և իրական հնարավորությունների մասին։
Մեծ թվով վերլուծաբանների և ինստիտուտների գնահատմամբ, ինչպիսին օրինակ՝ Էներգետիկայի և մաքուր օդի ուսումնասիրության ֆիննական կենտրոնն է (CREA), հակառուսական պատժամիջոցները դեռ չեն տվել ռուսական տնտեսության համար այն կործանարար արդյունքը, որի վրա հույսը դրել էր Արևմուտքը:
Ընդհակառակը, պատերազմի պատճառով ուռճացված էներգակիրների գները ներխուժումից հետո առաջին վեց ամիսներին Ռուսաստանին բերեցին մոտ 158 միլիարդ եվրո եկամուտ։ Այդ գումարի կեսից ավելին Մոսկվան ստացել է եվրոպացի սպառողներից։
Սակայն վերջին իրադարձությունները և, մասնավորապես, ԿԺԴՀ-ից զենքի գնումը վկայում են այն մասին, որ պատժամիջոցներն աստիճանաբար հասնում են իրենց նպատակներին, և հիմնական հարվածը, ըստ Արևմուտքի, ընկնում է ռուսական ռազմական արդյունաբերության վրա։
Օրինակ` Մեծ Բրիտանիայի պաշտպանության նախարարությունը երկուշաբթի հրապարակած տվյալներում նշում էր. «Ըստ ամենայնի, Ռուսաստանը մեծ դժվարություններ է ապրում ճակատը անօդաչու սարքերով զինելու հարցում, ինչը կապված է միջազգային պատժամիջոցների հետևանքով առաջացած բաղադրիչների պակասի հետ»։
Հաջորդիվ բրիտանական պաշտպանական գերատեսչության հրապարակումում նշվում էր, որ «իր հերթին, հետախուզական անօդաչու թռչող սարքերի սահմանափակ ներկայությունը նվազեցնում է հրամանատարության մարտավարական իրազեկությունը և ավելի ու ավելի դժվարացնում ռուսական բանակի գործողությունները»:
New York Times-ը նաև նշում է, որ Չինաստանի աջակցության հետ կապված Մոսկվայի հույսերը նույնպես չեն արդարացել:
Պարբերականը նշում է, որ Պեկինը պատրաստ է գնել ռուսական նավթը դեմպինգային գներով, սակայն մինչ այժմ պահպանել է միջազգային պատժամիջոցների պայմանները՝ Ռուսաստանին զենք կամ դրանց արտադրության համար բաղադրիչներ ու տեխնոլոգիաներ տրամադրելու հարցում։
«Մոսկվան հույս ուներ, որ Չինաստանը պատրաստ կլինի հրաժարվել այդ արտահանման վերահսկողությունից և կշարունակի մատակարարումները ռուսական բանակին: Սակայն վերջին օրերին ամերիկացի պաշտոնյաներն ասում էին, որ թեև Չինաստանը պատրաստ է գնել ռուսական նավթը զեղչով, Պեկինը գոնե մինչ այժմ հարգել է Մոսկվայի զինված ուժերին ուղղված արտահանման վերահսկողությունը և չի փորձել վաճառել ռազմական տեխնիկա կամ բաղադրիչներ»,-ասվում է New York Times-ի հոդվածում:
