ԱՄՆ ՄԶԳ-ն հրապարակել է իր՝ «ԴԵԿԼԵՊՏԻՖԻԿԱՑՄԱՆ ՈՒՂԵՑՈՒՅՑ – Կլեպտոկրատիան ապամոնտաժելու հնարավորության պատուհանների օգտագործում» ուղեցույցը: Այն ռեսուրս է ԱՄՆ ՄԶԳ աշխատակիցների համար, ովքեր աշխատում են արմատացած կոռուպցիայի մեջ հայտնված երկրներում: Այն նաև նպատակ ունի օրակարգ սահմանել դոնորների, գործընկերների, գիտնականների և այլ փորձագետների համար, որոնք կենտրոնացած են կլեպտոկրատիայի և ռազմավարական կոռուպցիայի դեմ պայքարի վրա:
Փաստաթուղթը համապատասխան քաղաքականության և ծրագրային փաստաթղթերի փաթեթի մի բաղադրիչն է, որը մշակում է Հակակոռուպցիոն աշխատանքային խումբը (ACTF)՝ ԱՄՆ ՄԶԳ-ում կոռուպցիայի դեմ պայքարը բարձրացնելու և Կոռուպցիայի դեմ պայքարի ԱՄՆ ռազմավարության իրականացումը խթանելու համար:
Զեկույցը հետաքրքիր կերպով նկարագրում է քաղաքական փոփոխությունների «հնարավորությունների պատուհանի» ֆենոմենը և արդյունավետ ու ժամանակին արված քաղաքական վերլուծության ու գնահատման նշանակությունը, երբ բացվում է հնարավորությունների այդ պատուհանը։ Ձեռնարկի համաձայն՝ քաղաքականության վերլուծությունն առավել արդյունավետ է, երբ բացվում է հնարավորությունների պատուհան: Գնահատումը կարող է հատկապես ժամանակին լինել կա՛մ վիճելի ընտրություններից ամիսներ առաջ, որոնք կարող են տապալել այդ երկրի կլեպտոկրատին, կա՛մ կարճ ժամանակ անց այն բանից հետո, երբ կոռումպացված ռեժիմը փոխարինվի հանրային լայն աջակցություն վայելող, բայց կառավարման ոլորտում սահմանափակ փորձով բարեփոխիչներով:
Վերը նկարագրված «հնարավորությունների պատուհանի» Ֆենոմենի առումով՝ հետաքրքրական է այն փաստը, որ ԱՄՆ ՄԶԳ-ն իր 80 էջանոց ուղեցույցում ներկայացնում է «Կլեպտոկրատիայի ցանցն Ադրբեջանում» ինֆոգրաֆիկան։ Արդյոք սա նուրբ ակնարկ է թե՛ Ադրբեջանի կլեպտոկրատական ռեժիմին, թե՛ երկրի քաղաքացիական հասարակությանը, որ հնարավորության պատուհանը շուտով կարող է բացվել, պարզ չէ: Բայց մի բան պարզ է, որ ԱՄՆ արտաքին քաղաքականության առանցքային ինստիտուտներից կամ գործիքներից մեկը, ինչպես ԱՄՆ ՄԶԳ-ն, միանշանակ հայտարարում է, որ Ադրբեջանի իշխող վարչակարգը կլեպտոկրատիա է:
Ուղեցույցի հեղինակները իրավացիորեն գտնում են, որ «կլեպտոկրատների և օլիգարխների խորը գրպաններն ու չարագործ ազդեցությունը հաղթահարելը հնարավոր է միայն դոնորների, իրականացնող գործընկերների, գիտնականների և այլ փորձագետների համաշխարհային հանրության ուժերը միավորելու միջոցով, ուժեր, որոնք կենտրոնացած են այն բանի վրա, թե ինչպես միջազգային օգնությունը կարող է հակազդել կլեպտոկրատիային և ռազմավարական կոռուպցիային»:
Սակայն, մյուս կողմից, առնվազն տարօրինակ է թվում, որ այդ նույն ԱՄՆ նախագահ Ջո Բայդենի վարչակազմը միաժամանակ շարունակում է ԱՄՆ-ի հարկատուների կողմից ֆինանսավորվող ռազմական օգնությունը (ավելի քան 164,000,000 ԱՄՆ դոլար) ուղարկել Ադրբեջանի կլեպտոկրատ ռեժիմին:
