«Քաղաքացիական պայմանագիր» խմբակցության համար չափազանց կարևոր էր Ազգային ժողովի դահլիճում ունենալ միասնականություն խորհրդարանական բոլոր խմբակցությունների միջև, որը, ցավոք, չհաջողվեց: Ազգային ժողովում այս մասին հայտարարեց «Քաղաքացիական պայմանագիր» խմբակցության պատգամավոր Վլադիմիր Վարդանյանը, ով Ադրբեջանի հարձակման վերաբերյալ հայտարարության նախագծի համահեղինակն է:
ՔՊ պատգամավոր Արփինե Դավոյանը հետաքրքրվեց, թե արդյոք ընդդիմության կողմից ներկայացվել են առաջարկներ հայտարարության հետ կապված և ի՞նչ ընթացք է ստացել այդ քննարկումը:
«Առավոտյան 9:40-ից սկսած գրեթե անընդհատ աշխատանք ենք տարել մեր ընդդիմադիր գործընկերների հետ: Գիտեք, բանակցություններում զրոյական արդյունքը դիտարկվում է որպես զրոյական արդյունք: «Պատիվ ունեմ» և «Հայաստան» խմբակցությունները ներկայացնել էին առանձին առաջարկների փաթեթներ:
«Հայաստան» խմբակցության կողմից ներկայացված առաջարկի փաթեթը ուղղակիորեն կամ անուղղակիորեն վերաբերելի չէր երեկ սանձազերծած գործողություններին, ինչի մասին ես իմ գործընկերներին տեղեկացրել եմ: «Պատիվ ունեմ» խմբակցության առաջարկների մի մասը վերաբերելի էին որոշ մասով ստեղծված իրավիճակին և պատրաստ էինք մասնակիորեն հաշվի առնել այդ առաջարկները նշված հայտարարության մեջ: Ընդ որում, ուզում եմ հստակ նշել, որ մեզ համար չափազանց կարևոր էր այսօր դահլիճում ունենալ միասնականություն խորհրդարանական բոլոր խմբակցությունների միջև, որը, ցավոք, չհաջողվեց: «Պատիվ ունեմ» խմբակցության ղեկավար Հայկ Մամիջանյանի հետ երկարատև քննարկումների ընթացքում հնարավոր չեղավ համաձայնեցնել այնպիսի առաջարկների փաթեթ, որում կընդգրկեին նրանց կողմից ներկայացված առաջարկների մի մասը, քանի որ մյուս մասն անընդունելի էր»,- ասաց Վարդանյանը:
