Ուզբեկստանում մեկնարկել է «Շանհայական համագործակցության կազմակերպության» գագաթնաժողովը, որի շրջանակներում ՌԴ նախագահ Վլադիմիր Պուտինը հանդիպում է ունեցել Չինաստանի նախագահ Սի Ցզինպինի հետ։
Հանդիպման սկզբում Պուտինը խոստացել է Չինաստանի ներկայացուցիչներին բացատրել «ուկրաինական ճգնաժամի» վերաբերյալ հարցերը։
«Պետք է ասեմ, որ միաբևեռ աշխարհ ստեղծելու փորձերը վերջերս բացարձակապես վատ տեսք են ստացել և բացարձակապես անընդունելի են պետությունների ճնշող մեծամասնության համար։ Մենք բարձր ենք գնահատում չինացի ընկերների հավասարակշռված դիրքորոշումը ուկրաինական ճգնաժամի հետ կապված, հասկանում ենք ձեր հարցերն ու մտահոգությունները այս հարցում, և այսօրվա հանդիպման ժամանակ, իհարկե, մանրամասն կբացատրեմ մեր դիրքորոշումն այս հարցում, թեև մենք խոսել ենք այս մասին նախկինում»,- նշել է ՌԴ նախագահը։
ՌԴ նախագահը նաև ասել է, որ Ռուսաստանը հաստատակամորեն հավատարիմ է «Մեկ Չինաստան» սկզբունքին և դատապարտում է «ԱՄՆ-ի արբանյակների սադրանքները» Թայվանի նեղուցում։
Սի Ցզինպինը, իր հերթին, իր ողջույնի խոսքում նշել է, որ կողմերը կարողացել են հաղթահարել համաճարակի ազդեցությունը և շարունակել «ամենակարևոր ռազմավարական երկխոսությունը»։ Նա Ռուսաստանին և Չինաստանին անվանել է առաջատար համաշխարհային տերություններ, որոնք աշխարհին տալիս են «կայունություն»։
Պուտինը հանդիպում է ունեցել նաև Իրանի նախագահ Իբրահիմ Ռաիսիի հետ։
Ռուսաստանի Դաշնության և Իրանի միջև համագործակցության նոր համաձայնագրի շուրջ աշխատանքները եզրափակիչ փուլում են, հայտարարել է ՌԴ նախագահ Վլադիմիր Պուտինը։
«Ռուսաստանի և Իրանի միջև նոր մեծ համաձայնագրի շուրջ աշխատանքը եզրափակիչ փուլում է, որը կնշանավորի համագործակցության հարաբերությունները»,- ասել է Պուտինը։
ՌԴ նախագահը նշել է, որ Մոսկվայի և Թեհրանի հարաբերությունները զարգանում են բոլոր ուղղություններով։ Նրա խոսքով՝ երկկողմ համագործակցությունը դրական է զարգանում, ապրանքաշրջանառությունն աճում է։
Ռուսաստանի և Իրանի միջև ապրանքաշրջանառությունն անցյալ տարի աճել է 81%-ով, իսկ այս տարվա առաջին հինգ ամիսներին՝ ևս 30 տոկոսով, ասել է Պուտինը։
Նա հավելել է, որ ակտիվ աշխատում է միջկառավարական հանձնաժողովը։
Հիշեցնենք, որ «Շանհայական համագործակցության կազմակերպության» հերթական գագաթնաժողովին նաև որպես հյուր հրավիրված էր վարչապետ Նիկոլ Փաշինյանը, սակայն սեպտեմբերի 13-ին ՀՀ սահմանների նկատմամբ սկսված հարձակումից հետո ՀՀ վարչապետ Նիկոլ Փաշինյանը հայտարարեց, որ ներկա չի գտնվի գագաթնաժողովին։
Սակայն Ադրբեջանի նախագահ Իլհամ Ալիևը գտնվում է Ուզբեկստանում և արդեն իսկ հանդիպումներ է ունեցել Թուրքիայի և Ուզբեկստանի նախագահների հետ։
Նա հանդիպում կունենա նաև ՌԴ նախագահի հետ, որտեղ երկու երկրների ղեկավարները կքննարկեն հայ-ադրբեջանական սահմանին տիրող իրավիճակը, այս մասին հայտնել է Կրեմլի խոսնակ Դմիտրի Պեսկովը։
