Վերջին օրերին ռուսական օկուպացիայից Ուկրաինայի արևելքում գտնվող Իզյում քաղաքի և հարակից շրջանները ուկրաինական բանակի կողմից ազատագրելուց հետո մերձակա անտառներում հայտնաբերվել են հերթական զանգվածային գերեզմանները: Այս մասին հայտնում են ուկրաինական իշխանությունները:
Հարձակման ընթացքում ուկրաինական զորքերը հարյուրավոր փայտե խաչեր են գտել քաղաքի հարակից անտառում, որոնց մեծ մասը անանուն է՝ պարզապես համարակալված:
Իշխանությունները հայտնել են, որ այսօր՝ սեպտեմբերի 16-ից կսկսեն գերեզմանների արտաշիրմումը:
Դեռևս պարզ չէ, թե ինչ է պատահել մահացածների հետ, սակայն, ըստ նախնական տեղեկությունների, թաղվածներից ոմանք հավանաբար զոհվել են հրետակոծությունից և բժշկական օգնության բացակայությունից։
Հավանական է նաև, որ թաղվածներից որոշներն էլ ուկրաինացի զինվորակններ են, քանի որ տեղադրված փայտե խաչերից որոշների վրա առկա են նման նշումներ, ինչպես օրինակ «ՈւԶՈւ (Ուկրաինայի զինված ուժեր), 17 մարդ, Իզյումից, դիահերձարանից»:
Խարկովի մարզի Ազգային ոստիկանության գլխավոր շտաբի պետ Վլադիմիր Տիմոշկոն բրիտանական BBC-ին հայտնել է, որ այդ վայրում ավելի քան 400 դի է թաղված:
Նախորդ գիշեր Ուկրաինայի ժողովրդին ուղղված իր ուղղերձում նախագահ Վլադիմիր Զելենսկին հայտնել էր, որ տեղում աշխատանքներ են սկսել իրականացնել նաև քննիչները: «Խարկովի մարզի Իզյումում մարդկանց զանգվածային գերեզմաններ են հայտնաբերվել։ Այնտեղ արդեն սկսվել են անհրաժեշտ գործընթացները։ Լրացուցիչ տեղեկություններ, առավել հստակեցված և ստուգված հասանելի կլինեն վաղը»,-ասել էր Զելենսկին:
Նրա խոսքերով` վաղը Իզյում կժամանեն նաև ուկրաինացի և միջազգային լրագրողները։
«Մենք ցանկանում ենք, որ աշխարհն իմանա, թե իրականում ինչ է կատարվում, և ինչի է հանգեցրել ռուսական օկուպացիան։ Բուչա, Մարիուպոլ, հիմա, ցավոք, Իզյում… Ռուսաստանն ամենուր մահ է թողնում և դրա համար պետք է պատասխան տա: Աշխարհը պետք է Ռուսաստանին իրական պատասխանատվության ենթարկի այս պատերազմի համար: Անում ենք ամեն բան դրա համար»,-ասել էր Զելենսկին:
Իզյումում զանգվածային գերեզմանների հայտնաբերմանը իր Twitter-յան էջում արձագանքել էր նաև Ուկրաինայի նախագահի խորհրդական Միխայլո Պոդոլյակը։
«450 գերեզման: Սա մասսայական գերաեզմանների միայն մի մասն է, որոնք հայտնաբերվել են Իզյումի կողքին: Որոշները դեռ ցանկանո՞ւմ են կանգնեցնել պատերազմը տանկեր ուղարկելու փոխարեն: Մենք իրավունք չունենք մարդկանց մեն-մենակ թողնել չարքի հետ»,- գրել էր Պոդոլյակը:
Ռուսաստանում օտարերկրյա գործակալություն հայտարարված «Настоящее время» հեռուստաալիքը նույնպես Իզյումի մոտ հայտնաբերված գերեզմաններից նկարներ էր հրապարակել՝ նշելով, որ դրանք ստացել էր ուկրաինացի լրագրողներից: Դրանց իսկությունը լրատվականին հաստատել էր Հատուկ հանգամանքներում անհայտ կորածների հարցերով ուկրաինացի հանձնակատար Օլեգ Կոտենկոն:
«Խոսքը հարյուրավոր գերեզմանների մասին է։ Բայց պետք է հասկանալ, թե ինչպես են մարդիկ մահացել։ Կարծում եմ, որ դա հենց բռնությամբ վրա հասած մահ է, և կարծում եմ, որ դա հրետակոծության հետևանք է: Չեմ ցանկանա սա Բուչա անվանել: Այստեղ մարդիկ, այսպես ասած առավել քաղաքակիրթ ձևով են թաղված: Տեսել եմ գերեզմանները, որոնք այնքան էլ փոքր չէին: Չէի ցանկանա այդ մասին մտածել, բայց կարծում եմ` այնտեղ կան նաև մահացած երեխաներ»,-ասել էր Կոտենկոն «Настоящее время» -ին:
Ռուսաստանը, ինչպես գարնանը Բուչայի դեպքերի ժամանակ, այնպես էլ այս անգամ հերքում էր Իզյումի հարակից շրջաններում հայտնաբերված զանգվածային գերեզմանների հետ ունեցած առնչությունների մասին տեղեկությունները և Ուկրաինային մեղադրում սադրանքներ հրահրելու մեջ։
Խարկովի մարզի օկուպացիոն վարչության ղեկավար Անդրեյ Ալեքսեենկոն ТАСС գործակալությանը ասել էր. «Վստահաբար կարող եմ ասել, որ եթե մարդիկ ինչ-որ բանից վախենում էին, ապա դա միայն ուկրաինացի պատժիչ ուժերի գնդակոծություններն էին։ Ինչպես և Բուչայում, սա կարող է սադրանք լինել: Ակնհայտ արյունալի սադրանք: Եթե, ինչ-որ դիակներ են հայտնաբերվել, ապա դա կարող է միայն լինել այդտեղ եկած ուկրաինացի պատժիչ ուժերի ձեռքի գործը»:
Պետդումայի միջազգային հարցերով հանձնաժողովի ղեկավար Լեոնիդ Սլուցկին էլ Զելենսկու հայտարարությունը անվանել է «հերթական ստոր սադրանք և սուտ»։
Սլուցկու խոսքերով` «հետագա սցենարը արդեն պարզ է. տեղում կհայտնվեն «ճիշտ» լչատվալններն ու լուսանկարիչները, որոնք լուսանկարներ կանեն նույն «ճիշտ» ԶԼՄ-ների համար: Որևէ ապացույց, որևէ մեկը չի տեսնի: Եվ հետո, ըստ հստակ ձևավորված սխեմայի, Ռուսաստանի դեմ մեղադրանքները կսկսվեն նոր պատժամիջոցների ու զենքի խնդրանքով»։
ՄԱԿ-ի Մարդու իրավունքների գերագույն հանձնակատարի գրասենյակի ներկայացուցիչ Էլիզաբեթ Տրոսելը արդեն հայտնել է, որ կառույցը մտադիր է մոնիտորինգային այց կազմակերպել Իզյում՝ պարզելու այդ անձանց մահվան հանգամանքները:
