Երևանի Թբիլիսյան խճուղի — Հրաչյա Աճառյան փողոցները կապող կամուրջը շահագործման կհանձնվի սեպտեմբերի 18-ին:
Այս մասին հայտնել է Երևանի քաղաքապետարանը, նշելով, որ այս կապուղու դեֆորմացիոն կարերի վերանորոգման աշխատանքներն իրականացնելու նպատակով, կամուրջը փակվել էր դեռևս օգոստոսի 10-ից:
«Աշխատանքների ընթացքում ի հայտ եկան մի շարք հավելյալ խնդիրներ, որոնց հայտնաբերումը մինչև շինարարական ժամանակահատվածում հնարավոր չէր: Երևանի քաղաքապետարանը որոշեց գնալ խնդիրների հիմնավոր լուծման ճանապարհով, ինչի արդյունքում, սակայն, շինարարական աշխատանքները փոքր-ինչ ձգձգվեցին»,- ասվում է հաղորդագրության մեջ:
Գերատեսչությունից պատճառված անհարմարությունների համար հայցում են Երևանի բնակիչների և մայրաքաղաքի հյուրերի ներողամտությունը և հայտնում, որ արդեն հիմնանորոգված կամրջով սեպտեմբերի 18-ից երթևեկության բոլոր սահմանափակումները կհանվեն, ինչը, ի թիվս այլոց, էապես կթեթևացնի դեպի Աճառյան փողոց շարժվող տրանսպորտային հոսքը:
