«Հրապարակ» օրաթերթը գրում է.
Երեկ ռուսական մամուլը գրեց հերթական բազմամիլիոնանոց գործարքի մասին։ Այս անգամ խոսքը Bunge ագրոարդյունաբերական ընկերության մասին էր, որին պատկանում է Oleyna հայտնի ապրանքանիշը, անգամ Հայաստանում այս ձեթը հայտնի է, վաճառվում է ցանկացած խանութում:
Նման գործարքները վերջին շրջանում բազմաթիվ են, արևմտյան ընկերությունները, սանկցիաներով պայմանավորված, լքում են ռուսական շուկան, իսկ ռուսական ընկերությունները ՌԴ իշխանությունների աջակցությամբ գնում են նրանց ակտիվները: Այս գործարքը հետաքրքիր չէր լինի, եթե հաղորդագրության մեջ չլիներ նոր գնորդի անունը։ Պարզվում է Bunge յուղամշակման բիզնեսը վաճառվել է Exoil Group-ին, որի վերահսկիչ բաժնետերը Կարեն Վանեցյանն է՝ «Հայրենիք» կուսակցության նախագահ Արթուր Վանեցյանի հարազատ եղբայրը:
130 միլիոն դոլար արժեք ունեցող բիզնեսի գործադիր տնօրեն Գրեգ Հեքմանը վստահություն է հայտնել, «որ ագրոբիզնեսի ոլորտում քսանհինգ տարվա փորձ ունեցող Վանեցյանի ղեկավարությամբ թիմը կշարունակի բավարարել հաճախորդների կարիքները»: Պարզվում է՝ սա Կարեն Վանեցյանի երկրորդ գործարանն է, առաջինը նա ստեղծել է 2014 թվականին զրոյից, իսկ ոլորտում գործունեություն է ծավալել 1997 թվականից, այս գործարանի գնմամբ Կարեն Վանեցյանի «ExOil Group» ՍՊԸ-ն ռուսական շուկայում դարձել է, ձեթի խոշորագույն արտադրող: Գործարանը գտնվում է Վորոնեժում:
Ամբողջությամբ` թերթի այսօրվա համարում
