1.1 C
Yerevan
6 Փետրվարի, 2023
238787.2 By Google Analytics 05.02.2023
Գլխավոր » Ո՞ւր կփախչի Պուտինը պատերազմից հետո ու կփախչի, թե՞ ոչ
Վերլուծական

Ո՞ւր կփախչի Պուտինը պատերազմից հետո ու կփախչի, թե՞ ոչ

Քաղաքակիրթ աշխարհը կարծում է, որ, երբ Պուտինը պարտվի ու փախչի Ռուսաստանից, ոչ ոք չի ընդունի նրան, որպեսզի իր համար խնդիրներ չստեղծի: Ես կարծում եմ, ընդհակառակը: Նրան շատերը կփորձեն ընդունել: Նույնիսկ եվրոպական երկրները: Դիցուք, Հունգարիան: Թուրքիան նույնպես բացառություն չէ որպես մերձեվրոպական երկիր: Տարբերակ է թեկուզ Սերբիան:

Նախ Պուտինը փող է: Պուտինը միլիարդներ է, որոնք կմնան նրան ընդունող երկրին: Երկրորդ, ընդունող երկիրը Պուտինին Հաագա հանձնելու համար լուրջ առևտուրի մեջ կմտնի միջազգային հանրության հետ: Դիցուք, Իրան փախած Պուտինին արտահանձնելու համար այդ երկիրը կարող է տնտեսական պատժամիջոցների մեղմացում կորզել: Պուտինը «միջուկային» զենք է, որի չեզոքացման շուրջ լուրջ «բազարներ» կսկսվեն:

Այլ հարց, որ Պուտինից բացի տվյալ երկիրը ռուս այլ բարձրաստիճան հանցագործի չի ընդունի, եթե նա գոնե Պուտինի ունեցածի կեսը չունի, երկրորդ, այդպիսով կդառնա «Արգենտինա», որը պարտակում էր նացիստական հանցագործներին:

Այլ հարց, որ Պուտինին իր երկիր չի ընդունի, ասենք, Կիմ Չեն Ընը: Նախ Պուտինի փողերն այդ երկրին չեն օգնի, պատժամիջոցներն այնպիսին չեն, որ փողի ավելցուկով որոշ դեֆիցիտներ ծածկվեն, երկրորդ, դա կարող է վնասել նաև Ռուսաստան-ԿԺԴՀ հետագա հարաբերություններին, որովհետև ոչ թե փախած Պուտինը, այլ հանձնված Պուտինը մնալու է Ռուսաստանի խնդիրը: Մյուս կողմից նույնիսկ ԿԺԴՀ-ն կարող է շահել Պուտինին պարտակելուց: Բացի դրանից, ԿԺԴՀ-ն այն երկիրն է, որի վրա ոչ ոք չի համարձակվի հարձակվել Պուտինին ստանալու վերջնագրով, դա միջուկային երկիր է, որն առանց աչք թարթելու հարձակվողի վրա կուղղի իր հրթիռները: Ինչպես ասում են, ԿԺԴՀ-ի ատամի տակ ոսկոր չկա: Ի դեպ, բացառված չէ, որ Պուտինն ինքը ռիսկ չանի մտնել Կիմ Չեն Ընի ողորմածության տակ: Այդ մարդուց ամեն ինչ սպասելի է:

Բայց կա նաև Չինաստանը: Սա կայսերական երկիր է այն իմաստով, որ ժամանակին կայսրություն է եղել: Եթե նա ընդունեց Պուտինին (եթե ընդունեց), ոչ մի գնով չի արտահանձնի: Թեպետ Չինաստանը նույնպես երկար կմտածի, թե ո՞րն է իր օգուտը «ռազմական հանցագործի» պիտակ ունեցող մարդուն պատսպարելուց:

Կա նաև Սաուդյան Արաբիայի տարբերակը, որը մոտ 20 տարի տիրություն արեց աֆրիկյան մարդակեր և բռնակալ Իդի Ամինին: Բայց այնտեղ իրավիճակ է փոխվել: Այդ երկիրը Պուտինի որոշ հաշվարկներով 100-160, այլ հաշվարկներով 200 միլիարդ դոլարի կարիքը չունի, երկրորդ, այնտեղ շատ խորն է արևմտյան ինտեգրացիան, արդեն երրորդ տարին Ֆորմուլա-1 է ընդունում, խնդիրներ ունի Սիրիայի հետ, որի նախագահը իր աթոռին մնաց հենց Պուտինի շնորհիվ:

Կարճ ասած, Պուտինը մեծ հաշվով փախչելու տեղ չունի: Հետևաբար, ըստ իս, Պուտինը ինչ-որ պահից հենց նախագահի կարգավիճակում կգնա պատերազմի դադարեցման ու բանակցություններով իր հետիշխանական ճակատագիրը որոշելու ճանապարհով: Որովհետև աշխարհում ոչ մեկի վրա նա չի կարող հույս դնել:

Արսեն Գրիգորյան

Բեռնում.....
-->