Ֆրանսիայի նախագահ Էմանուել Մակրոնը պաշտոնական այցով գտնվում է Չինաստանում: Այցի հիմնական նպատակներից մեկն էր համոզել Չինաստանին զենք չտրամադրել Ռուսաստանին և ազդել Պուտինի վրա, որպեսզի նա գնա բանակցությունների: Սակայն, Չինաստանի նախագահ Սի Ցզինպինը բանակցություններից հետո դիրքորոշումը փոխելու նշաններ ցույց չի տվել: Այս մասին գրում է Politico-ն։
Մասնավորապես, նա կրկնել է իր վաղեմի թեզը Ռուսաստանի կողմից Ուկրաինա լայնամասշտաբ ներխուժման վերաբերյալ՝ ասելով, որ «բոլոր կողմերն ունեն ողջամիտ անվտանգության մտահոգություններ»: Նա չի արել գեթ մեկ ակնարկ, որ իր ազդեցությունը կօգտագործի Ռուսաստանի վրա ճնշում գործադրելու համար՝ ստիպելու Պուտինին դադարեցնել ներխուժումն Ուկրաինա, գրում է թերթը։
Սի Ցզինպինը միայն հայտարարել է, որ «Չինաստանը պատրաստ է միանալ Ֆրանսիային՝ կոչ անելով միջազգային հանրությանը մնալ ռացիոնալ և հանգիստ»։
Սի Ցզինպինի շրջապատի անդամները նկատել են նաև, որ Մակրոնը երկու անգամ ավելի շատ է խոսել, քան հանդիպման հյուրընկալողը՝ Չինաստանի ղեկավարը, ինչը կարող է ընկալվել որպես Մակրոնի կողմից դիվանագիտական սխալ, գրում է Politico-ն։
