«Մեծ յոթնյակը» (G7) մտադիր է արգելափակել ռուսական ակտիվները մինչև Ուկրաինայում պատերազմի ավարտը, ասվում է աշխարհի յոթ զարգացած երկրների խմբի արտգործնախարարների համատեղ հայտարարության մեջ։
«Ռուսաստանի ինքնիշխան ակտիվները մեր իրավասություններում կմնան անշարժ, քանի դեռ չի լուծվել Ռուսաստանի կողմից Ուկրաինայի ինքնիշխանության և տարածքային ամբողջականության խախտման հետ կապված հակամարտությունը։ Հակամարտության ցանկացած կարգավորում պետք է ապահովի, որ Ռուսաստանը վճարի [Ուկրաինային] պատճառված վնասի համար»,- ասվում է փաստաթղթում։
Բացի այդ, «Մեծ յոթնյակի» երկրները նախատեսում են էլ ավելի խստացնել Ռուսաստանի դեմ պատժամիջոցները և խստորեն հետևել դրանց իրականացմանը: Նրանք նաև մտադիր են համակարգել ջանքերը երրորդ երկրեների կողմից Ռուսաստան զենքի մատակարարումը կանխելու և ռուսական ագրեսիան ֆինանսավորողների դեմ միջոցներ ձեռնարկելու ուղղությամբ։
Ուկրաինա Ռուսաստանի լայնամասշտաբ ներխուժման մեկնարկից անմիջապես հետո ԱՄՆ-ը, Մեծ Բրիտանիան, ԵՄ երկրները և նրանց միացած երկրները սառեցրել են Ռուսաստանի արժութային պահուստները իրենց իրավասություններում:
Ռուսաստանի ֆինանսների նախարար Անտոն Սիլուանովի գնահատմամբ, պատժամիջոցները Մոսկվային զրկել են մոտ 300 միլիարդ դոլարից։
Ռուսաստանի Կենտրոնական բանկի ղեկավար Էլվիրա Նաբիուլինան ապրիլի 18-ին ասել է, որ Կենտրոնական բանկն աշխատում է սառեցված պահուստները վերադարձնելու ուղղությամբ։ Նա նաև հիշեցրել է, որ Ռուսաստանում սառեցվել են «ոչ բարեկամական երկրներից» ոչ ռեզիդենտների միջոցները, ինչը, իր հերթին, «ձևավորում է ՌԴ բանակցային դիրքերն այս հարցում»։
