ՀՀ ազգային ժողովի նախագահ Ալեն Սիմոնյանը թույլ տվեց վերականգնել նախորդ օրը տեղի ունեցած միջադեպից հետո դահլիճից հեռացված կամ ինքնակամ դուրս եկած ընդդիմադիր պատգամավորների ելույթները, որոնց համար գրանցվել էին դեռ ապրիլի 20-ին՝ Կառավարոության ծրագրի 2021 թվականի կատարման ընթացքի և արդյունքների մասին զեկույցի քննարկմանը:
Նիստի մեկնարկին «Հայաստան» խմբակցության ղեկավար Սեյրան Օհանյանը վարման կարգով իր ելույթում ասաց. «Միջադեպ պատճառով «Հայաստան» խմբակցության պատգամավորների նախապատրաստած ելույթներն ընդհատվեցին: Առաջարկում ենք վերականգնել, որ պատգամավորները հնարավորություն ունեն խոսել՝ հաշվի առնելով մի քանի հանգամանքներ: Առաջին հերթին այն, որ նիստի ընթացքը վերականգնվեց դեռևս միջադեպի հետևանքները մինչև վերջ չվերականգնված, մեր պատգամավորների որոշ մասը դրսում էին, նույնիսկ այստեղից դուրս գալու հնարավորություն չկար»:
Նա նշեց՝ կառավարության ծրագրի կատարման զեկույցին գնահատական տալը, ելույթներով հանդես գալն անհրաժեշտություն է նաև քաղաքական իշխանության, կառավարության համար, որ լսեն ու հաջորդ տարվա ծրագրերում հետևություններ անեն:
Ալեն Սիմոնյանն ասաց, որ առաջարկն ընդունելի է, ելույթները կվերականգնվեն: Սակայն ԱԺ նախագահը խնդրեց հայրենակիցներին զերծ պահել վիրավորանքներից, ելույթների մեջ հնարավոր սադրանքներից: «Կարծում եմ՝ մեր հայրենակիցները, որոնք ընտրել են ձեզ, մեզ, չպետք է ականատես լինեն, թե ինչպես են ընդդիմության պատգամավորներն այստեղ քողարկված վիրավորանքներ ասում, սադրում և հետագայում «զոհի» կարգավիճակով ներկայանում մամուլի առաջ: Եթե մենք կարողանում ենք ապահովել բովանդակային քննարկում, որը մինչև օրս եղել է, ես կարծում եմ, միանշանակ կարելի է վերականգնել»,-ասաց Սիմոնյանը:
«Հայաստան» խմբակցության քարտուղար Արծվիկ Մինասյանն էլ ասաց՝ խոսքի ազատության սահմանափակումն ընդունելի չէ՝ հիշեցնելով, որ նախորդ օրը իրենց խմբակցության ելույթները ոչ միայն քաղաքական էին, այլ հստակ գնահատականներ էին տալիս: Նա վստահեցրեց, որ իրենց նպատակն ամենևին խաթարելը չէ, հակառակը՝ օբյեկտիվ գնահատական տալն է: Ըստ Մինասյանի՝ նախորդ օրը ԱԺ ամբիոնից անպարկեշտ արտահայտություններ են հնչել ՀՅԴ-ի հասցեին, և իրենք պատրաստվում են հակադարձել:
ԱԺ նախագահն էլ արձագանքեց՝ ինքն անպարկեշտ հայտարարություն չի ընդունի:
«Քաղաքացիական պայմանագիր» խմբակցության ղեկավար Հայկ Կոնջորյանն էլ վարման կարգով իր ելույթում հայտնեց՝ կողմ է, որ իր ընդդիմադիր գործընկերների ելույթի իրավունքը վերականգնվի: Նա նաև առաջարկեց վերկանագնել ՔՊ խմբակցության այն պատգամավորների ելույթների հնարավորությունը, որոնք հանել էին նախորդ օրը: ԱԺ նախագահը դրան ևս համաձայնեց:
