Ստեփանակերտից ո՛չ հերքում, ո՛չ հաստատում են ադրբեջանական լրատվամիջոցներում տարածված տեղեկությունը, համաձայն որի՝ ադրբեջանցի «էկոակտիվիստները» որոշել են այսօր, ժամը 18:00-ից դադարեցնել բողոքի ակցիան Լաչինի միջանցքում:
Արցախի նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը NewArmenia-ի հետ զրույցում չբացառեց, որ հնարավոր է՝ «էկոակտիվիստները» բացեն Լաչինի միջանցքը, քանի որ, ըստ նրա, նրանք արդեն իրենց դերակատարությունն ունեցել են:
«էկոակտիվիստներն իրենց դերակատարությունն ունեցել են՝ փակելով Լաչինի միջացքը, քանի որ մյուս կողմում տեղադրվել է անցակետը: Հետևաբար, նրանց կողմից միջանցքը փակելը, մարտավարական իմաստով, արդեն իմաստ չունի: Լաչինի միջանցքն արդեն դարձել է «պրոխոդնոյ դվոր»: Ես մտածում եմ, որ նրանք կհեռանան, բայց ցանկացած պահի կարող են վերադառնալ»,- նշեց Բաբայանը:
Նշենք, որ, ըստ ադրբեջանական լրատվամիջոցների՝ Ադրբեջանցի «էկոակտիվիստներ»-ը հայտարարել են, թե այսօր՝ ժամը 18։00-ից, դադարեցնում են Լաչինի միջանցքում իրականացվող ակցիան։ Նշվում է, որ «էկոակտիվիստներ»-ը Շուշիի շրջանում հանդիպում են ունեցել Ադրբեջանի կառավարության ներկայացուցիչների հետ, որի ժամանակ կառավարության ներկայացուցիչները ներկայացրել են, որ ապրիլի 23-ից պետական սահմանային ծառայության ստորաբաժանումները անցակետ են տեղադրել Հայաստանի հետ սահմանին, և ուստի մասնակիցներին ևս մեկ անգամ առաջարկվել է դադարեցնել ակցիան:
Հիշեցնենք՝ ադրբեջանցի «էկոակտիվիստ» ներկայացողները 2022թ. դեկտեմբերի 12-ից փակել են Լաչինի միջանցքը՝ հայտարարելով, որ այնտեղ ակցիա են իրականացնում։ Իսկ ապրելի 23-ին էլ Լաչինի միջանցքում՝ Հակարիի կամուրջի վրա, ադրբեջանցիներն անցակետ են տեղադրել։
