Լոռու մարզում հաջորդ տարի զբոսաշրջիկների, ճամփորդողների համար կգործի նոր կառուցված ճամփեզրյա կայան, որում կվաճառվի նաև տեղական ՓՄՁ-ների արտադրած սնունդ: Այս մասին հրավիրված ասուլիսում հայտնեց ՀՀ էկոնոմիկայի փոխնախարար Նաիրա Մարգարյանը՝ ներկայացնելով փոքր ու միջին ձեռներեցության զարգացմանն ուղղված պետական քաղաքականությունը:
«Լոռու մարզում կառուցում ենք ճամփեզրյա կայան, որը կգործարկենք հաջորդ տարվանից: Այն շատ ժամանակակից կառուցվածք ունի։ Սրա նպատակն է, որ ճանապարհորդությունը, զբոսաշրջությունն էլ ավելի արդիական դարձնենք: Բայց դրա թաքնված նպատակներից է նաև այն, որ դրանում կվաճառվեն տեղական ՓՄՁ-ների արտադրած սնունդը եւ ոչ միայն»,-ասաց Մարգարյանն ու նշեց՝ շեշտը դրվում է տեղական ՓՄՁ-ների զարգացման և իրենց շուկա դուրս գալու հնարավորության վրա:
Ճամփեզրյա կայանում կգործի նաեւ զբոսաշրջային կենտրոն, սրճարան, խանութ, կոնֆերանս դահլիճ, զուգարան և այլն: Փոխնախարարը նշեց՝ իրենք կառուցում են կայանը, սակայն փնտրում են գործարկողների՝ ձեռնարկատերերի, որոնց հետաքրքիր կլինի գործել այդ կայանում: Այդ առիթով Ներդրումների աջակցման կենտրոնի կայքում հայտարարությունն ակտիվ է, հետաքրքրված ցանկացած ձեռնարկատեր կարող է դիմել։
