ՀՀ վարչապետ Նիկոլ Փաշինյանը և կառավարության ներկայացուցիչներն անցած տարի բազմիցս հայտարարել էին, որ 2020 թ. հունվարի 1-ից կենսաթոշակները միջինում 10% բարձրանալու են: Այդ «միջինում» բառը լրատվականների վերնագրերից հաճախ սղվում էր և մարդիկ սպասում էին հենց 10% բարձրացման:
Եվ ահա հունվարի առաջին օրերին կենսաթոշակները փոխանցվեցին, բայց շատ դեպքերում այդ բարձրացումը 10%-ից պակաս էր` 4%, 7.1%, 8.2% և այլն:
NewArmenia.am-ը ՀՀ աշխատանքի և սոցիալական հարցերի նախարարության կենսաթոշակային ապահովության վարչության պետ Անահիտ Գալստյանից հետաքրքրվեց` ինչպե՞ս է հաշվարկ իրականացվել, որ կենսաթոշակների բարձրացումը հենց 10% չի կազմել և մարդիկ իրենց խաբված են զգում:
«Կենսաթոշակը հաշվարկվում է բանաձևով` հիմք ընդունելով աշխատանքային տարվա արժեքը, որը կառավարության որոշմամբ է, ու աշխատանքային ստաժը: Եվ, բնականաբար, տարբեր ստաժի դեպքում մեծությունը տարբեր է ստացվում»,- ասաց Ա.Գալստյանը:
Նա նշեց, որ կենսաթոշակի հաշվարկման բանաձևը նշված է «Պետական կենսաթոշակների մասին» օրենքի 15 հոդվածում:
Ըստ այդ օրենքի տվյալ հոդվածի`«Աշխատանքային կենսաթոշակի չափը հիմնական կենսաթոշակի չափի և կենսաթոշակի աշխատանքային մասի գումարն է:
Կենսաթոշակի աշխատանքային մասը աշխատանքային ստաժի տարիների, աշխատանքային ստաժի մեկ տարվա արժեքի և կենսաթոշակառուի անձնական գործակցի արտադրյալն է:
Աշխատանքային կենսաթոշակը հաշվարկվում է հետևյալ բանաձևով.
Կ=Հ+ (Ս X Ա) X Գ, որտեղ`
Կ-ն կենսաթոշակի ամսական գումարն է,
Հ-ն` հիմնական կենսաթոշակի չափը,
Ս-ն` աշխատանքային ստաժի տարիները,
Ա-ն` աշխատանքային ստաժի մեկ տարվա արժեքը,
Գ-ն` կենսաթոշակառուի անձնական գործակիցը:
2. Կենսաթոշակառուի անձնական գործակիցը հաշվարկելիս հիմք է ընդունվում տարիքային աշխատանքային կենսաթոշակի իրավունք տվող 25 տարվա աշխատանքային ստաժը:
Մինչև 25 տարվա (ներառյալ) աշխատանքային ստաժի մեկ տարվա համար գործակիցը սահմանվում է 0,04, իսկ 25 տարուց ավելի աշխատանքային ստաժի մեկ տարվա համար` 0,02:
Կենսաթոշակառուի անձնական գործակիցը հաշվարկվում է`
ա) մինչև 25 տարվա (ներառյալ) ստաժի առկայության դեպքում` Գ=0,04 X Ս բանաձևով,
բ) 25 տարուց ավելի աշխատանքային ստաժի առկայության դեպքում` Գ=1+0,02 X (Ս-25) բանաձևով»:
