Թուրքագետ Ռուբեն Սաֆրաստյանը կարծում է, որ Իրանի և ԱՄՆ-ի միջև հակամարտության առաջին փուլն ավարտված է: Նա լրագրողների հետ հանդիպմանը նշեց, թե ավարտված է մարտավարական, տակտիկական փուլը։
«Հիմա հակամարտությունը կտեղափոխվի ռազմավարական հարթություն: Իրանը հստակ հայտարարել է, որ ամեն ինչ կանի, որ վերջ տա ամերիկյան զինված ուժերի ներկայությանը Մերձավոր Արևելքում, սա կարևոր հետևանքներ ունեցող նպատակ է»,-ասաց նա:
Միևնույն ժամանակ Սաֆրաստյանը հիշեց, որ ԱՄՆ նախագահ Դոնալդ Թրամփն իշխանության գալու ժամանակ հայտարարել է, որ իր համար առաջնայինն ԱՄՆ է, ավելին՝ ձգտելու է թուլացնել ԱՄՆ ռազմական ներկայությունը տարբեր տարածաշրջաններում։
«Կարծես Թրամփին չի հաջողվում իրականացնել, զուգահեռ աշխարհը միջազգային հարաբերությունների առումով մտնում է մի նոր փուլ: Ես կարծում եմ, որ մոտակա 1-2 տարվա ընթացքում Մերձավոր Արևելքում հանգիստ չի լինի, երկու երկրներն իրենց նպատակներն արդեն դրել են, և տեսնենք, թե ինչ ընթացք կունենա»,-նշեց Սաֆրաստյանը։
Վերջինս խոսեց նաև Թուրքիայի մասին՝ նկատելով, որ Թուրքիան իր նպատակը հստակ ձևակերպել է։ Սաֆրաստյանի գնահատմամբ՝ Թուրքիան ցանկանում է դառնալ տարածաշրջանային առումով առաջատար պետություն, որը որոշումներ ընդունող ուժի կենտրոն կլինի:
«Թուրքիայի արտաքին քաղաքականությունը մտնում է մի նոր փուլ, որի էությունն է` Զինված ուժերի օգտագործումը: Թուրքիայի արտաքին քաղաքականությունը մտել է շատ վտանգավոր փուլ բոլոր հարևանների հետ և չի զլանում օգտագործել իր պոտենցիալը, որը Մերձավոր Արևելքում ամենաուժեղն է»,-շարունակեց Ռուբեն Սաֆրաստյանը։
Ասուլիսի մյուս բանախոս իրանագետ Վարդան Ոսկանյանն էլ, համաձայնելով գործըներոջ հետ, հավալեց, որ Ղասեմ Սոլեյմանին Իրանում նեծ սեր էր վայելում։
«Իրանում լայնածավալ սգո միջոցառումներ էին, և ահռելի թվով մարդիկ էին մասնակցում, ինչը ցույց է տալիս, թե ինչ հեղինակություն, համակրանք ու սեր էր վայելում Ղասեմ Սոլեյմանին: Ակնհայտ է, որ իրանցիները օգտագործելու են իրենց բոլոր հնարավորությունները` հասնելու իրենց հիմնական նպատակին` Մերձավոր Արևելյան տարածաշրջանում կրճատելու ԱՄՆ զինված ներկայությունը, և առաջինը դա վերաբերում է Իրաքի տարածքին»,-ասաց նա:
Ոսկանյանի գնահատմամբ՝ Ղասեմ Սոլեյմանիի սպանությունից հետ իրանական հասարակությունը խիստ համախմբված է, և սոցիալական բողոքի գործողությունները իշխանություններից զգալիորեն պակասել են:
«Մենք ունենք Իրան, որն արտաքին վտանգի առաջ համախմբվել է, և այս իմաստով Սոլեյմանիի սպանությունը ոչ միայն ռազմական առումով կորուստ էր, այլ նաև իր մահով նա մինչև հիմա էլ ծառայում է իր ժողովրդին»,-եզրափակեց Վարդան Ոսկանյանը։
