Հայաստանում ընթացող ներքաղաքական զրագացումների և արտաքին անելիքների շուրջ զրուցել ենք ԱԺ Եվրոպական ինտեգրման հարցերով մշտական հանձնաժողովի անդամ, «Իմ քայլը» խմբակցության պատգամավոր Սոնա Ղազարյանի հետ:
— Տիկին Ղազարյան, ինչպե՞ս կմեկնաբանեք իշխանության վերնախավում վերջին փոխատեղումները և պաշտոնանկությունները:
-Ես կարծում եմ, որ պաշտոնանկությունները նորմալ գործընթացներ են իրականում և նորմալ է, որ ժամանակի ընթացքում աշխատանքի որակի հետ կապված՝ վարչապետն ունենում է տարբեր դիրքորոշումներ և տեղի են ունենում պաշտոնանկություններ։ Այստեղ կարևոր է շեշտել, որ, թե՛ Վալերիյ Օսիպյանի և թե՛ Արթուր Վանեցյանի պարագայում, նրանց պաշտոնանկությունը վարչապետի որոշման արդյունքն է և պարոն Փաշինյանին պարզապես չէին բավարարել նրանց երկուսի գործունեությունն ու աշխատելաձևն այդ պաշտոններում:
-Իմ քայլը խմբակցությունում կան պատգամավորներ, ովքեր թիմի ընդհանուր գծի հետ չհամընկնող հայտարարություններով են հանդես գալիս: Բացի դա, այդ հանգամանքը մամուլում, տարբեր գործիչների կողմից մեկնաբանվում է, թե թիմում պառակտումներ կան, խմբակցությունը մասնատվում է և այլն, ինչպե՞ս կմեկնաբանեք դա։
-Ես տեսել եմ հայտարարություններ, որոնք իրականում խմբակցության տեսակետին որոշ ժամանակ չեն համընկել: Բայց մենք թիմում որդեգրել ենք մի սկզբունք, որ ցանկացած խնդիր պետք է քննարկվի և պետք է լսվեն, թե՛ կողմ, թե դեմ փաստարկները, և միայն դրա միջոցով է, որ հնարավոր է վեր հանել այն միակ ճշմարտությունը: Եվ ես ձեզ հավատացնում եմ, որ այնպիսի բուռն քննարկումներ, ինչպիսիք տեղի են ունենում «Իմ քայլը» խմբակցությունում, տեղի չեն ունենում խորհրդարանական նստաշրջանների ժամանակ: Ես կարծում եմ, որ լուսանցքում մնացած որոշ քաղաքական ուժեր պարզապես օրուգիշեր ակնկալում են, թե երբ է սայթաքելու «Իմ քայլը» դաշինքը կամ երբ է սայթաքելու մեր քաղաքական թիմը և անհեթեթ պատմություններ են հորինում մեր խմբակցության և քաղաքական թիմի մասին: Շատ հաճախ դրանք մակագրվում են որպես արտահոսքեր խմբակցության քաղաքական քննարկումներից, բայց շատ հաճախ դրանք ոչ այլ ինչ են, քան ստեղծագործական աշխատանք և շատ հաճախ չեն համապատասխանում իրականությանը:
-Ինչպիսի՞ն է Ձեր տեսակետը բնապահպանական խնդիրների, Ամուլսարի խնդրի և վերջին գործընթացների վերաբերյալ: Հարցը խնդրում եմ դիտարկեք ավելի գլոբալ առումով:
Ես լսել եմ, մեր բնապահպանական թիմի ներկայացուցիչներին, համապատսխան հանձնաժողովի դիրքորոշումը, տեսակետն եմ լսել, լսել եմ մեր տնտեսական հանձնաժողովի տեսակետները և նման քննարկումներ են տեղի ունեցել նաև վարչապետի, փոխվարչապետի մասնակցությամբ և իմ տեսակետն այն է, որ այս հարցը պետք է լուծվի իրավական ճանապարհով: Եվ եթե մենք չունենք բավարար հիմքեր նոր ՇՄԱԳ-ի, ապա նոր ՇՄԱԳ-ը բացառում ենք, փնտրում ենք այլ տարբերակ: Այս դեպքում, ամենաիրատեսական և իրավական ճանապարհն այն է, որպեսզի մեր հարգելի քաղաքացիները, որոնք հիմա գտնվում են Ամուլսարի մոտ, ապաշրջափակեն Ամուլսարի տարածքը և այնտեղ ներս մտնի Բնապահպանական տեսչությունը և թույլ տա, որպեսզի շինարարությունը շարունակվի: Եվ այստեղ կարևոր է այն, որ մենք ցանկացած խնդիր լուծելու ենք օրենքի շրջանակներում: Սա իմ մոտեցումն է, որ մեկ անգամ սայթաքումը և էմոցիոնալ որոշում կայացնելը տանելու է շատ ավելի լուրջ խնդիրների և մենք ըստ էության հետ ենք գնալու մի տեղ, ինչի արդյունքում սկսել ենք հեղափոխությունը:
-Դուք ԱԺ-ում Եվրոպական ինտեգրման հարցերի մշտական հանձնաժողովի անդամ եք, ինչպես նաև մի շարք երկրների հետ բարեկամական խմբերի ու Ֆրանկոֆոնիայի խորհրդարանական վեհաժողովում ՀՀ պատվիրակության: Ինչ անելիքներ կան այստեղ և այժմ այդ ուղղություններով ՀՀ-ն ինչ գործունեույթուն է ծավալում:
Այո, ես շատ մեծ մասնակցություն ունեմ խորհրդարանական դիվանագիտության ուղղությամբ, քանի որ մի շարք գործողումներ եմ ունեցել, մեր հանձնաժողովն էլ շատ անելիքներ ունի: Մասնավորապես, հիմա մենք աշխատում ենք ՍԵՊԱ համաձայնագրի ճանապարհային քարտեզի իրականացման վերահսկողության շուրջ: Դրա վառ օրինակն էր, երբ որ մենք հրավիրեցինք արդարադատության նախարարին՝ տեսնելու, թե ինչպես է իրագործվում ՍԵՊԱ-ի ճանապարհային քարտեզով ամրագրված հակակոռուպցիոն ռազմավարության իրականացումը: մենք նաև մի շարք այլ գերատեսչությունների հետ ենք աշխատում, քանի որ ՍԵՊԱ-ն իրենից ներկայացնում է ինքնապարփակ մի համաձայանգիր, որը 29 ոլորտների է առնչվում: Եվ այդպիսի ոլորտային քննարկումների ներգրավում ենք նաև այլ հանձնաժողովների ներկայացուցիչների: Ֆրանկոֆոնիայի և բարեկամական խմբերի առումով տեղի են ունեցել մի շարք գործուղումներ: Հոկտեմբերին 14-ին էլ բարեկամական խմբի կազմով մեկնելու եմ Փարիզ, այնտեղ Հայաստան-Ֆրանսիա երկկողմ հարաբերությունների զարգացումից զատ նաև պետք է խոսենք վիզաների ազատականացման, երկխոսության մեկնարկի մասին: Որովհետև ինչպես տեղյակ եք, այդ մեկնարկը պետք է տեղի ունենա և մեր բարեկամ պետությունները շատ անելիք ունեն այնտեղ, ես կարծում եմ, նաև ԵՄ անդամ այլ պետություններին այս օրակարգը հրամցնելու գործում:
-Անընդհատ խոսվում է խորհրդարանական դիվանագիտության կարևորության մասին, այժմ, մեր խորհրդարանական դիվանագիտությունն ինչ շեմեր է սահմանել և ինչով է զբաղվում, խնդրում եմ մի փոքր պարզաբանել իրավիճակը:
-Ինձ համար շատ վառ օրինակ էր, պարոն Միրզոյանի պատվիրակության կազմով, երբ որ մեկնեցի Շվեդիա, և այնտեղ, թե ինչպես էին մեզ ընդունում մեր շվեդ գործընկերները, և ինչպիսի հիացմունքի էինք արժանանում, թեկուզ լեզվի իմացության, մեր գիտելիքի առումով: Թեպետ Հայաստանում հաճախ խոսվել է այն մասին, որ նոր խորհրդարանականներն անփորձ են և մի շարք այլ դիտարկումներ, բայց կարող եմ ասել, որ մեր այս խորհրդարանական այցերի ժամանակ, բազմիցս միջազգային գործընկերները նշում են, որ թե լեզվի իմացության և թե գիտելիքի առումով շատ ավելի ներկայացուցչական կազմով ենք մեկնում, քան նախկինում:
Շատ կարևոր է այստեղ ամրագրել, որ շատ այլ մակարդակներում են տեղի ունենում մեր քննարկումները, քանի որ նրանք իրապես գիտակցում են, որ իրենց դիմաց նստած են ժողովրդավար պետության լեգիտիմ իշխանության ներկայացուցիչներ: Քանի որ, մենք հպարտորեն ներկայացնում ենք, դեկտեմբերի 9-ին տեղի ունեցած խորհրդարանական ընտրությունների աննախադեպ որակը, մեր խորհրդարանի աննախադեպ լեգիտիմ լինելը և ձգտումները՝ ունենալ մաքսիմալ լավ հարաբերություններ մեր բոլոր միջազգային գործընկերների հետ:
— Եթե անդրադառնանք ՀՀ-ԵՄ համաձայնագրի վավերացման գործընթացին, ի՞նչ փուլում ենք այժմ գտնվում:
ՀՀ-ԵՄ համաձայնագիրը վավերացրել են ԵՄ անդամ պետությունների կեսից ավելին, բայց ՀՀ-ն ունի քաղաքական կամք՝ սկսել կիրարկել համաձայնագիրը առանց սպասելու, որ բոլոր պետությունները կվավերացնեն, քանի որ դա, ըստ էության տեխնիկական բնույթ է կրում այլ անդամ պետությունների վավերացումը, նրանք գրեթե բոլորի ազգային խորհրդարանների օրակարգում են : Ըստ այդմ, մենք ունենք համաձայնագրի 70 տոկոսի ճանապարհային քարտեզը, որը հաստատվել է մեր և ԵՄ-ի կողմից և Մոգերինիի կողմից շատ բարձր գնահատականի է արժանացել: Իդեպ, պարոն Սվիտալսկին էլ իր լիազորությունները դադարելուց առաջ հենց այդ էր նշում, թե ինչ որակյալ ճանապարհային քարտեզ ունենք:
