Ռոբերտ Քոչարյանի պաշտպան Հայկ Ալումյանն, անդրադառնալով դատավոր Աննա Դանիբեկյանի որոշմանն, ասաց, որ ինքը պնդում է՝ խափանման միջոցի հետ կապված նախորդ և այսօրվա որոշումները կայացվել են դատարանի նկատմամբ բացահայտ, աննախադեպ ճնշումների ադզեցության տակ:
«Դատարանը դարձել է գործիք Քոչարյանի նկատմամբ քաղաքական հետապնդումների համար: Դատարանն այսօր գործում է գործադիր իշխանության համար որպես գործիք․ դա բացահայատ է իրականացվում»,- ասաց Հայկ Ալումյանը:
Հիշեցնենք, որ այսօրվա և նախորդ դատական նիստերին դատավոր Աննա Դանիբեկյանը մերժել էր Ռոբերտ Քոչարյանի պաշտպանների միջնորդությունները՝ իրենց պաշտպանյալի խափանման միջոցը փոխելու, նրան կալանքից ազատելու վերաբերյալ, ինչպես նաև անազատության հետ կապ չունեցող խափանման միջոց կիրառելու և գրավով ազատ արձակելու վերաբերյալ:
Փաստաբան Ալումյանը դատարանից ժամանակ խնդրեց դատավորին ինքնաբացարկի միջնորդություն ներկայացնելու համար։
Դատավորը դատական նիստը հետաձգեց և նշանակեց հոկտեմբերի 7-ին։
