Գյումրիի Սև բերդում Հայաստանի Հանրապետության 28-ամյակին նվիրված միջոցառումների շրջանակում մեկնարկել է «Մեր ժամանակի հերոսը» մրցանակաբաշխությունը:
Մրցանակաբաշխության մասնակիցները վերջին մեկ տարվա ընթացքում «Մեր ժամանակի հերոսը» հաղորդման հերոսներն են՝ տարբեր մասնագիտությամբ մարդիկ՝ կավագործ, զոդող և այլն։ Միջոցառման ընթացքում պաշտոնյաներն ու հյուրերը հերոսներին են հանձնում մրցանակներ։ Մրցանակի հավակնորդները 45 հոգի են։ Նախատեսված է 12 մրցանակ և 13-րդ հատուկ մրցանակ, որը հանձնելու է վարչապետը
Հաղթողին տրվելիք արձանիկի ներքևի հատվածում գրված է «Մեր ժամանակի հերոսը»։ Այն պատրաստված է հայելուց, որպեսզի մարդն իրեն այդ հայելու մեջ տեսնի և զգա, որ ինքը կարող է լինել մեր ժամանակի հերոսը:
Այս մրցանակաբաշխությունը Հայաստանում անցկացվում է առաջին անգամ: Առաջին մրցանակակրին՝ Ռուբեն Գևորգյանին մրցանակը հանձնեց ՀՀ ժողովրդական արտիստ Տիգրան Մանսուրյանը:
Միջոցառման ավարտին վարչապետը բեմ հրավիրեց մրցանակաբաշխությանը մասնակցած բոլոր 45 մասնակիցներին: Նա շնորհակալություն հայտնեց բոլոր մասնակիցներին՝ իրենց կատարած աշխատանքի համար: Նշեց, որ ՀՀ տաբեր փուլերում երբեք լավատեսական կանխատեսումներ չեն եղել, հոռետեսությունը եղել է հիմնական կանխատեսումը ՀՀ-ի համար, բայց այս մարդկնաց գոյությունը, նրանց աշխատանքը կաթիլ առ կաթիլ կերտել է լավատեսության հաղթանակը Հայաստանում:
Միջոցառման ժամանակ հնչում էին Տիգրան Մանսուրյանի ստեղծագործությունները: Այն ավարտվեց «Լավ էլի» խմբի երգիչ Մհեր Մանուկյանի «Մենք ժպտում ենք» երգի կատարմամբ։
