Չնայած տեքստիլի արտադրությունը հանրապետությունում պարետատունը դեռ չի թույլատրել ու նախապես հայտարարված ապրիլի 20-ի ժամկետը փաստացի երկարաձգվել է, «Ալեքս տեքստիլը» վաղը աշխակիցներին պարտադիր աշխատանքի է կանչել:
«Թղթի մեջ կգրեք՝գնում եք խանութ, կգաք գործի»,-ըստ NewArmenia.am-ին դիմած աշխատակիցների՝ ասել է ղեկավարությունը: Ի տարբերություն, օրինակ, Վանաձորի «Գլորիա» կարի արտադրամասի, որի աշխատակիցներն այսօր գրոհել էին արտադրամասն ու բողոքի ցույց էին անում՝ աշխատանքը վերսկսելու համար, «Ալեքս տեքստիլի» աշխատակիցները մտավախություններ ունեն աշխատանքի վերսկսման հետ կապված:
«Անգամ պատուհան չկա մեր արտադրամասում: Իրենց փողի համար ուզում են մեր ընտանիքները տուրը տալ»,- դժգոհեց մեզ դիմած աշխատակիցը, որը աշխատում է Ծերեթելի-Բագրատունյաց փողոցների խաչմերուկում գտնվող «Երևան Սիթիի» վերևի հարկում:
Ի դեպ, ղեկավարությունը նրանց զգուշացրել է, որ եթե հանկարծ այս մասին լրագրողներն իմանան, իրենց համար վատ կլինի:
Հիշեցնենք, որ «Ալեքս տեքստիլը» պատկանում է մեծահարուստ գործարար Սամվել Ալեքսանյանին, որը հրաժարվել է վճարել աշխատակիցների հարկադիր պարապուրդի դիմաց՝ արտակարգ դրության պայմաններում:
