Պետության ղեկավարի համար նման այցերը պարբերական բնույթ են կրում, եթե չասենք պարտադիր: Newarmenia.am-ի հետ զրույցում անդրադառնալով ՀՀ վարչապետ Նիկոլ Փաշինյանի՝ ԱՄՆ այցին՝ նշեց ՀՀ ԱԺ «Բարգավաճ Հայաստան» խմբակցության պատգամավոր Շաքե Իսայանը: «Վերջիվերջո, խոշորագույն հայկական համայնք ունենք ԱՄՆ-ում:
Այլ հարց է, թե օրակարգում միայն Սփյուռքի հետ հանդիպումը և ՄԱԿ-ի 74-րդ Գլխավոր ասամբլեայում ելու՞յթն էր, թե՞ ոչ: Միայն հետագան ցույց կտա, թե սույն օրակարգային ծրագրված այցերից բացի այլ պայմանավորվածություններ քաղաքական, տնտեսական կամ այլ ասպեկտներում ձեռք բերվե՞լ է, թե ոչ»,- ընդգծեց պատգամավորը:
Ըստ նրա՝ այս այցի արդյունավետությունը միայն որոշ ժամանակ անց հնարավոր կլինի գնահատել՝ գործնական որոշակի դրսևորումներից ելնելով:
Թեմայի շուրջ զրուցեցինք նաև «Իմ քայլը» խմբակցության պատգամավոր Նազելի Բաղդասարյանի հետ, ով մասնավորապես նշեց.
«Շատ կարևոր էր հասկանալ, որ Սփյուռքի տեսակարար մասը, որը գտնվում է օվկիանոսից այն կողմ, լավ ընդունում է և աջակցում է գործադիրի ղեկավարին, սա իսկապես կարևոր է, որովհետև հայ ժողովուրդն ամբողջական է՝ անկախ այն հանգամանքից՝ հայաստանցի է, թե ապրում է Սփյուռքում և իսկապես մեր միասնության մեջ է մեր ուժը։ Սա ևս մեկ անգամ ապացուցում է, որ պետությունը գնում է հստակ, ճիշտ քայլերով, իսկ ցանկացած գնահատականի արդյունքում կամ հենքում պետք է լինի կատարված աշխատանքը»,- ընդգծեց պատգամավորը։
