«Իմ քայլը» խմբակցության անդամ Սուրեն Գրիգորյանն ընդունում է, որ Սահմանադրական դատարանի դատավոր (անդամ) Հրայր Թովմասյանի լիազորությունները դադարեցնելու հարցով Սահմանադրական դատարան դիմելու ԱԺ նախաձեռնությունը քաղաքական հարց է, քանի որ գործընթացն ԱԺ կողմից է նախաձեռնվել: Այսօր ԱԺ նիստում Սահմանադրական դատարանի դատավոր (անդամ) Հրայր Թովմասյանի լիազորությունները դադարեցնելու հարցով Սահմանադրական դատարան դիմելու հարցի քննարկման ժամանակ հայտարարեց «Իմ քայլը» խմբակցության պատգամավոր Սուրեն Գրիգորյանը:
«Այս իմաստով, իհարկե, քաղաքական է: Այն իմաստով քաղաքական հետապնդում չի, որ քաղաքական նպատակահարմարության, քաղաքական կոնյուկտուրայի որոշակի շահերի դրդապատճառներ այս պրոցեսի հիմքում չկան: Բայց չպետք է խորշենք և ասենք, որ այն իմաստով, որ ԱԺ կողմից իրականացվող գործընթաց է և վերաբերում է մի սահմանադրական մարմնի կողմից մեկ այլ սահմանադրական մարմնին դիմելուն, այս իմաստով պրոցեսը քաղաքական է: Իհարկե, այդ քաղաքականն ու իրավականը իրար չեն բացառում: Ավելին` հենց Սահմանադրությունը, որ երկրում բարձրագույն իրավական ուժ ունեցող փաստաթուղթն է, հանդիսանում է իրավա-քաղաքական փաստաթուղթ»,- ասաց Ս.Գրիգորյանը:
