Իլհամ Ալիևի պատասխանը ևս մեկ անգամ ապացուցում է, որ ի տարբերություն հայկական կողմի, Ադրբեջանը կառուցողական չէ և հակամարտության խաղաղ հանգուցալուծում չի ուզում։ ԱԺ ֊ում լրագրողների հետ զրույցում նման տեսակետ հայտնեց ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանն՝ անդրադառնալով Ադրբեջանի նախագահ Իլհամ Ալիևի՝ «Ղարաբաղն Ադրբեջան է և վերջ» հայտարարությանը։
«Հայաստանի վարչապետ Նիկոլ Փաշինյանին ասածն այն է եղել, որ կա հակամարտություն և այն կարող է ունենալ միայն խաղաղ հանգուցալուծում, և եթե մենք ուզում ենք ունենալ խաղաղ հանգուցալուծում, ապա պետք է լինի այնպիսի լուծում, որ և՛ ՀՀ֊ի, և՛ Արցախի, և՛ Ադրբեջանի ժողովուրդը համաձայն լինեն այդ հանգուցալուծմանը։ Ալիևի պատախանը ցույց է տալիս, որ չի ընդունում այս բանաձևը, չի ցանկանում հակամարտության խաղաղ հանգուցալուծում»,-շարունակեց Ռուբեն Ռուբինյանը։
Ինչ վերաբերում է սահմանին զոհ և վիրավոր ունենալու հանգամանքին, պատգամավորը շեշտեց՝ սա նշանակում է, որ Ադրբեջանը շարունակում է իր ագրեսիվ վարքը, և աշխարհը տեսնում է դա։
«Հայաստանը բանակցային գործընթացը տեսնում է այն տրամաբանությամբ, որը ՀՀ վարչապետը ներկայացրել է ՄԱԿ-ի ամբիոնից», — ընդգծեց Ռուբեն Ռուբինյանը
