Վանդալները պղծել են հուշահամալիրի շենքը, որտեղ գտնվում էր հնդկական ազգային-ազատագրական շարժման առաջնորդ Մահաթմա Գանդիի դիափոշու սափորը` մուտքի մոտ գրելով «ազգի դավաճան»: Այդ մասին գրում է «АиФ»-ը` հղում անելով «India Today»-ի հրապարակմանը:
Միջադեպը տեղի է ունեցել առաջնորդի ծննդյան 150-ամյակը տոնելու օրը: Այն հայտնաբերել է տեղական խորհրդի ղեկավար Գուրմիտ Սինգհը, որը հուշահամալիր էր այցելել հոբելյանական տարեթվի կապակցությամբ:
«Երևի դա նրանց ձեռքի գործն է, ովքեր սիրում են Նաթհուրամ Գոձեին` Գանդիին սպանողին: Այդ ատելությանը պետք է անմիջապես վերջ տալ, իսկ ոստիկանությունը պետք է գործի արագ, որպեսզի նույնականացնի և անմիջապես բռնի հանցագործներին», — մեկնաբանել է Սինգհը:
Նշենք, որ Գանդին սպանվել է 1948 թվականին` ազգայնական-արմատական Նաթհուրամ Գոձեի կողմից, որը քննադատության էր ենթարկում հնդիկ առաջնորդի ոչ բռնի քաղաքականությունը և պայքարը հանուն ժողովրդի անկախության: Գոձեն մահապատժի դատապարտվեց, իսկ պատիժն իրականացվեց 1949 թվականի նոյեմբերին:
Տեղի ունեցածից որոշ ժամանակ անց «Interfax» լրատվական գործակալությունը, հղում անելով «Associated Press»-ին, հաղորդել է, որ, ըստ ոստիկանության աշխատակից Էս Բագխելի, Գանդիի դիափոշու սափորը սկզբունքորեն չէին կարող գողանալ, որովհետև այն այնտեղ երբևէ չի պահվել:
