Հաջորդ տարի Կենտրոնական բանկի աշխատակիցների աշխատավարձի ֆոնդը կավելանա 2 %-ով կամ 118.7 մլն դրամով: Ըստ 2020թ. բյուջեի նախագծի՝ նախատեսվում է ԿԲ աշխատավարձի գծով ծախսերի համար հատկացնել 6 մլրդ 145 մլն դրամ:
Ըստ այդմ՝ բանկի աշխատակիցների միջին ամսական աշխատավարձը կկազմի 640.1 հազար դրամ: Հաշվարկը կատարվել է 800 աշխատակցի հաշվով` այս տարվա 808 աշխատակցի փոխարեն: Այսինքն՝ 8 աշխատակից կրճատվելու է:
Նկատենք, որ 2020 թ. համար ՀՀ առևտրային բանկերի կողմից ՀՀ բանկային համակարգի միջին ամսական աշխատավարձի չափը կանխատեսվոում է 820.6 հազար դրամ:
ԿԲ ընդհանուր վարչական ծախսերը հաջորդ տարի կկազմեն 7 մլրդ 322.8 մլն դրամ՝ 2019 թվականի համեմատ 1.3 %-ով կամ 93.4 մլն դրամով ավելի:
Բանկի աշխատակազմի գործուղման ծախսերը (ներառյալ անձնակազմի ուսուցման և վերապատրաստման ծախսերը) նախատեսվում են 434.4 մլն դրամ, ներկայացուցչական ծախսերը՝ 54.2 մլն դրամ կամ 2019 թվականի ծրագրային համապատասխան ցուցանիշի մակարդակով:
Ուշագրավ է, որ ԿԲ-ն նվազեցրել է ծառայողական ավտոմեքենաների շահագործման և սպասարկման ծախսերը՝ 2020-ին 59.9 մլն դրամ՝ 2019-ի համեմատ 17.2 մլն դրամով պակաս: ԿԲ-ն ծրագրում է շահագործել 28 ավտոմեքենա: Մինչդեռ այս տարի ԿԲ-ի աշխատակիցներին սպասարկել է 32 ավտոմեքենա, որոնց սպասարկման համար ծախսվել է մոտ 74 մլն դրամ:
Մի քանի տարի առաջ խորհրդարանում բյուջետային քննարկումների ժամանակ պարզվեց, որ ԿԲ-ն միլիոնավոր գումարներ է ծախսում աշխատակիցների բջջային կապի համար: Օրինակ՝ այս տարի բանկում առկա թվով 39 բջջային հեռախոսների ընդհանուր ծախսը մոտ 6.4 մլն է: Թե որքա՞ն է նախատեսված հաջորդ տարվա համար, դեռ պարզ չէ: Սակայն ընդհանուր կապի, այդ թվում՝ քաղաքային ու կառավարական գծերի, տարեկան սպասարկումը կարժենա 28.4 մլն դրամ՝ 2019-ի համեմատ 3.3 մլն դրամով կամ 10.4 %-ով պակաս: Այս տարվա համեմատ էական՝ 23 %-ով, կրճատվելու են բանկի կապիտալ ներդրումները՝ կազմելով 10 մլրդ 947.4 մլն դրամ:
