Ներքին այրման շարժիչներով ավտոմեքենաների վաճառքը Դանիայում մինչև 2030 թվականը կարգելվի: Այդ մասին տեղեկացնում է «Известия» լրատվական կայքը` հղում անելով «eadaily.com»-կայքին: «Ա պլանի էությունը համաեվրոպական արգելքի հասնելն է»,- հայտարարել է Դանիայի բնապահպանության նախարար Դեն Յորգենսենը:
Այսպիսով, երկրի կառավարությունը հանդես է գալիս հանուն համաեվրոպական ռազմավարության, որպեսզի մինչև 2050 թվականը Եվրոպան դառնա աշխարհում առաջին կլիմայորեն չեզոք մայրցամաքը: Նշվում է նաև, որ 2017 թվականին էլեկտրական ավտոմեքենաների վաճառքը Դանիայում պակասել է, քանի որ կառավարությունը չեղարկել է դրանց սեփականատերերի համար նախկինում նախատեսված արտոնությունները:
Փորձագետները նշում են, որ էլեկտրական ավտոմեքենաները չեն փրկի ածխածնային արտանետումներից, քանի որ էլեկտրականության մեծ մասն այժմ արտադրվում է ջերմակայաններում, որոնք այրում են ածուխ կամ գազ:
2018 թվականի աշնանն էլ հայտարարվել էր, որ Իսպանիան պատրաստվում է ամբողջովին ազատվել բենզինով և դիզվառելիքով աշխատող ավտոմեքենաներից մինչև 2050 թվականը` միաժամանակ բարենպաստ պայմաններ ստեղծելով էլեկտրական ավտոմեքենաների վաճառքի համար:
