Այսօր հրապարակվել է Մարդու իրավունքների եվրոպական դատարանի որոշումը «Դավիթ Մաթևոսյանն ընդդեմ Հայաստանի Հանրապետության» գործով (գանգատ թիվ 61730/08)։
Եվրոպական դատարանը անդրադարձել է հարցերի հետևյալ շրջանակին՝
ա) երաշխավորվե՞լ է արդյոք դիմողի արդար դատաքննության իրավունքը, մասնավորապես՝ իր վկաներին կանչելու և հարցաքննելու իրավունքը,
բ) դիմողի մեղադրանքը և հետագա դատապարտումը հանդիսացե՞լ են արդյոք միջամտություն նրա կարծիք արտահայտելու ազատության և խաղաղ հավաքների ազատության իրավունքներին,
գ) դիմողի հետապնդումը և դատապարտումը չի եղե՞լ արդյոք խտրական՝ հիմնված նրա քաղաքական համոզմունքների վրա։
Դ․Մաթևոսյանի ներկայացուցիչ Մուշեղ Շուշանյանի տեղեկացմամբ՝ ՄԻԵԴ որոշմամբ ճանաչվել են արդար դատաքննության և խաղաղ հավաքների իրավունքների խախտումները։
ՄԻԵԴ-ը որոշել է, որ պետությունը Դ․Մաթևոսյանին պետք է որպես փոխհատուցում վճարի 13 հազար 200 եվրո։
«Չթերագնահատելով այս վճռի կարևորությունը կոնկրետ անձի իրավունքների պաշտպանության տեսանկյունից՝ այդուհանդերձ պետք է փաստենք, որ արդարադատությունը ինքնիշխան ազգերի մենաշնորհն է, իսկ նրանք, ովքեր արդարադատություն մուրում են միջազգային/վերազգային կառույցներում՝ երբեք չեն ունենա արդարադատություն»,- ֆեյսբուքյան իր էջում նշել է Մ․Շուշանյանը։
Հիշեցնենք, որ Դավիթ Մաթևոսյանը ձերբակալվել էր 2008-ի մարտի 1-ի առավոտյան՝ Ազատության հրապարակի խաղաղ հավաքը ցրելուց հետո։ Նա դատապարտվել էր 3 տարվա ազատազրկման ոստիկանի նկատմամբ բռնություն գործադրելու շինծու մեղադրանքով։ Դատարանները նրա մեղավորությունն ապացուցված էին համարել 2 ոստիկանների կեղծ և հակասական ցուցմունքներով, հրաժարվելով լսել անձանց, որոնք Դ․Մաթևոսյանին ձերբակալելու պահին նրա հետ էին եղել և կարող էին հերքել բռնություն կիրառելու մեղադրանքի կեղծ պնդումը։
